ممبئی – بالی ووڈ کی مقبول جوڑی شاہ رُخ خان اور دیپیکا پڈوکون ایک بار پھر بڑی اسکرین پر جلوہ گر ہونے جارہی ہے۔ دونوں اپنی نئی فلم کنگ میں اکٹھے نظر آئیں گے، جو ان کے کیریئر کی چھٹی مشترکہ فلم ہوگی۔
یہ اعلان دونوں اداکاروں نے سوشل میڈیا پر کیا جس کے بعد مداحوں میں خوشی کی لہر دوڑ گئی۔ دیپیکا، جو حال ہی میں فلم کالکی 2898 اے ڈی کے سیکوئل سے علیحدہ ہوئی ہیں، نے انسٹاگرام پر شاہ رُخ خان کے ساتھ ایک تصویر شیئر کی اور بتایا کہ 18 برس پہلے فلم اوم شانتی اوم کے دوران شاہ رُخ نے انہیں ایک اہم سبق سکھایا تھا۔
انہوں نے لکھا: “شاہ رُخ نے مجھے یہ سکھایا کہ فلم کی کامیابی سے زیادہ اہم وہ لوگ ہوتے ہیں جن کے ساتھ آپ یہ سفر طے کرتے ہیں۔ میں اس بات سے متفق ہوں اور اسی لیے ہم ایک ساتھ چھٹی فلم بنانے جارہے ہیں۔”
واضح رہے کہ دیپیکا پڈوکون نے 2007 میں شاہ رُخ خان کے ساتھ فرح خان کی ہدایت کاری میں بنی فلم اوم شانتی اوم سے بالی ووڈ میں ڈیبیو کیا تھا، جو سپرہٹ ثابت ہوئی اور ان کے کیریئر کی بنیاد بنی۔ اس کے بعد دونوں نے چنئی ایکسپریس اور پٹھان سمیت کئی کامیاب فلموں میں ایک ساتھ کام کیا۔
فلم کنگ کی باضابطہ تصدیق ہوچکی ہے، تاہم اس کی کہانی، کاسٹ اور ریلیز کی تاریخ کے بارے میں مزید تفصیلات تاحال سامنے نہیں آئی ہیں۔
