پاکستان کے اسپنر ابرآر احمد نے آئی سی سی مردوں کی ٹی ٹوئنٹی بولنگ رینکنگ میں شاندار پیشرفت کی ہے اور پہلی بار ٹاپ فائیو میں جگہ بنا لی ہے۔ 25 سالہ اسپنر نے 12 درجے ترقی حاصل کر کے چوتھی پوزیشن پر قبضہ جما لیا ہے اور اب ان کے پوائنٹس 703 ہیں، جس کے بعد وہ پہلی پوزیشن کے انتہائی قریب پہنچ گئے ہیں۔
ابرآر کی یہ کامیابی ایشیا کپ میں شاندار کارکردگی کے نتیجے میں سامنے آئی۔ متحدہ عرب امارات کے خلاف میچ میں انہوں نے 13 رنز کے عوض 2 وکٹیں حاصل کیں جبکہ سری لنکا کے خلاف محض 8 رنز دے کر ایک وکٹ اپنے نام کی۔ ان جادوئی اسپیلز نے نہ صرف میچز کا نقشہ بدل دیا بلکہ یہ بھی ثابت کر دیا کہ پاکستان کے پاس ٹی ٹوئنٹی فارمیٹ میں ایک میچ ونر موجود ہے۔
بولنگ رینکنگ میں سرفہرست بھارت کے ورون چکرورتی بدستور نمبر ون پر موجود ہیں، تاہم ابرآر کی تیز رفتار پیشرفت نے یہ دوڑ مزید دلچسپ بنا دی ہے۔
پاکستانی بولنگ لائن کے لیے ایک اور خوشخبری یہ ہے کہ فاسٹ بولر حارث رؤف بھی 9 درجے ترقی پا کر پہلی بار ٹاپ 30 میں شامل ہو گئے ہیں۔ بیٹنگ رینکنگ میں پاکستان کے صاحبزادہ فاران نے نمایاں ترقی حاصل کی جبکہ بھارت کے ابھیشیک شرما بدستور ٹاپ پوزیشن پر براجمان ہیں۔ دوسری جانب بنگلہ دیش کے مستفیض الرحمٰن دوبارہ ٹاپ 10 بولرز میں داخل ہو گئے ہیں۔
پاکستان اور سری لنکا کے میچ کے دوران ایک دلچسپ لمحہ اس وقت دیکھنے کو ملا جب وکٹ لینے کے بعد ابرآر احمد اور سری لنکن اسپنر ونیندو ہسارنگا نے ایک دوسرے کے جشن کی نقل کی اور پھر گلے مل کر کھیل کی روح کو اجاگر کیا۔
ابرآر کے لیے اصل کہانی یہ ہے کہ وہ مسلسل اعتماد کے ساتھ آگے بڑھ رہے ہیں، اور اگر یہ فارم جاری رہی تو بہت جلد دنیا کے بہترین ٹی ٹوئنٹی بولر کی کرسی ان کے نام ہو سکتی ہے۔
