اسلام آباد: عالمی یوم برائے معلومات تک رسائی کے موقع پر صدرِ مملکت آصف علی زرداری اور وزیراعظم شہباز شریف نے اپنے پیغامات میں کہا ہے کہ معلومات تک رسائی ہر شہری کا بنیادی اور جمہوری حق ہے، جو شفافیت، جوابدہی اور اچھی حکمرانی کی ضمانت ہے۔
صدر آصف زرداری نے کہا کہ معلومات کا آزادانہ بہاؤ شفاف طرز حکمرانی کو فروغ دیتا ہے، تاہم آج کا سب سے بڑا چیلنج غلط معلومات اور جعلی خبروں کا پھیلاؤ ہے جو قومی یکجہتی اور اداروں پر عوامی اعتماد کو متاثر کرتا ہے۔ انہوں نے میڈیا پر زور دیا کہ ذمہ دارانہ رپورٹنگ اپنائی جائے اور عوام سے کہا کہ غیر مصدقہ معلومات کے پھیلاؤ سے گریز کریں۔
وزیراعظم شہباز شریف نے کہا کہ معلومات تک رسائی نہ صرف اچھی حکمرانی کو مضبوط کرتی ہے بلکہ ریاست اور عوام کے درمیان اعتماد کی فضا قائم کرنے میں بھی مددگار ہے۔ انہوں نے بتایا کہ حکومت نے حق تک رسائی قانون 2017 اور پاکستان انفارمیشن کمیشن جیسے اقدامات کے ذریعے اس حق کو یقینی بنایا ہے۔
وزیراعظم نے مزید کہا کہ خواتین، نوجوانوں اور پسماندہ طبقات کو ڈیجیٹل دور میں مساوی مواقع دینا حکومت کی ترجیح ہے۔ انہوں نے تمام حکومتی اداروں، سول سوسائٹی، میڈیا اور ٹیکنالوجی پلیٹ فارمز سے اپیل کی کہ وہ ایک کھلے، شفاف اور علم پر مبنی معاشرے کی تعمیر میں کردار ادا کریں تاکہ عوام کو بااختیار بنایا جا سکے، جمہوریت کو مضبوط کیا جا سکے اور ترقی کے سفر کو تیز کیا جا سکے۔
