کراچی: شہر قائد میں پولیس اور ڈاکوؤں کے درمیان دو علیحدہ علیحدہ مبینہ مقابلوں میں تین زخمیوں سمیت پانچ ملزمان کو گرفتار کر لیا گیا۔ پولیس نے گرفتار ملزمان کے قبضے سے اسلحہ، گولیاں، موبائل فونز، نقد رقم، منشیات اور موٹرسائیکل برآمد کرلی۔
تفصیلات کے مطابق پہلا مقابلہ عزیزآباد کے علاقے کریم آباد فرنیچر مارکیٹ کے قریب جمعرات اور جمعہ کی درمیانی شب پیش آیا، جہاں پولیس نے کارروائی کرتے ہوئے ایک زخمی سمیت دو ملزمان کو گرفتار کرلیا۔ زخمی ملزم کو فوری طور پر عباسی شہید اسپتال منتقل کیا گیا۔
ایس ایس پی سینٹرل کے ترجمان کے مطابق زخمی ملزم کی شناخت 30 سالہ شہروز ولد مجاہد کے نام سے ہوئی ہے، جبکہ دوسرے گرفتار ملزم نے اپنا نام شارق ولد راجو بتایا۔ گرفتار ملزمان سے ایک پستول بمعہ گولیاں، موبائل فونز، نقدی اور موٹرسائیکل برآمد ہوئی۔
دوسرا مقابلہ پاک کالونی کے علاقے جہان آباد شیر شاہ پل کے قریب ہوا، جہاں پولیس نے اسی شب دو زخمیوں سمیت تین ملزمان کو گرفتار کیا۔ زخمی حالت میں گرفتار ملزمان کو سول اسپتال منتقل کیا گیا۔
کراچی پولیس کے ترجمان کے مطابق زخمی ملزمان کی شناخت 18 سالہ ثقلین ولد قاسم اور 19 سالہ جبار ولد جاوید کے ناموں سے ہوئی ہے، جبکہ تیسرے گرفتار ملزم نے اپنا نام کاشف ولد شیر دال خان بتایا۔
پولیس کے مطابق گرفتار ملزمان سے دو پستولیں بمعہ گولیاں، موبائل فونز، نقد رقم، منشیات اور ایک موٹرسائیکل برآمد کی گئی ہے۔
