علیگڑھ انسٹیٹیوٹ آف ٹیکنالوجی کے زیرِ اہتمام منعقد ہونے والی تیسری بین الشعبہ جاتی کرکٹ چیمپئن شپ 2025-26 میں بی ایس سی ایس نے شاندار کارکردگی کا مظاہرہ کرتے ہوئے ٹائٹل اپنے نام کر لیا۔ مقابلے عمران خان کرکٹ اسٹیڈیم میں منعقد ہوئے جن میں ادارے کے 13 مختلف شعبہ جات نے حصہ لیا۔
چیمپئن شپ میں سافٹ ویئر، بائیو میڈیکل، سول، کیمیکل، الیکٹرانکس، الیکٹریکل، مکینیکل، میکاٹرونکس، مصنوعی ذہانت، آرکیٹیکچر، سی آئی ٹی مارننگ، سی آئی ٹی ایوننگ اور بی ایس سی ایس کے طلبہ شریک ہوئے۔ پورے ٹورنامنٹ کے دوران طلبہ، اساتذہ اور کھیلوں سے دلچسپی رکھنے والوں کی بڑی تعداد میدان میں موجود رہی۔
فائنل میچ کی تقریب میں کنوینر سید محمد محسن کاظم نے بطور مہمانِ خصوصی شرکت کی جبکہ تقریب کی صدارت پرنسپل شاہد جمیل نے کی۔ اس موقع پر اساتذہ، طلبہ اور کھیلوں کے منتظمین بھی موجود تھے۔
کوارٹر فائنلز میں سافٹ ویئر نے سی آئی ٹی مارننگ کو شکست دی جبکہ سول نے الیکٹریکل کو ہرایا۔ تیسرے مقابلے میں مصنوعی ذہانت نے میکاٹرونکس کو شکست دی جبکہ بی ایس سی ایس نے سی آئی ٹی ایوننگ کو ہرا کر سیمی فائنل میں جگہ بنائی۔
پہلے سیمی فائنل میں سافٹ ویئر نے سول کو شکست دے کر فائنل کے لیے رسائی حاصل کی جبکہ دوسرے سیمی فائنل میں بی ایس سی ایس نے مصنوعی ذہانت کو شکست دے کر فائنل میں جگہ بنائی۔
فائنل مقابلہ سافٹ ویئر اور بی ایس سی ایس کے درمیان کھیلا گیا۔ سافٹ ویئر ٹیم نے پہلے کھیلتے ہوئے 82 رنز بنائے۔ جواب میں بی ایس سی ایس نے جارحانہ انداز اپناتے ہوئے صرف چھ اوورز میں ہدف مکمل کر لیا اور چیمپئن شپ اپنے نام کر لی۔
فائنل میچ کی نمایاں کارکردگی بی ایس سی ایس کے کپتان حارث کی رہی جنہوں نے صرف 10 گیندوں پر 44 رنز کی شاندار اننگز کھیلی۔ ان کی اننگز میں 6 بلند و بالا چھکے اور 2 چوکے شامل تھے۔ دوسری جانب بہزاد نے عمدہ گیند بازی کرتے ہوئے 3 اہم کھلاڑیوں کو آؤٹ کیا اور ٹیم کی کامیابی میں اہم کردار ادا کیا۔
ادارے کے شعبۂ کھیل کے زیرِ اہتمام طالبات کا کرکٹ مقابلہ بھی منعقد کیا گیا جو اے آئی ٹی گرین اور اے آئی ٹی وائٹ کے درمیان کھیلا گیا۔ اے آئی ٹی گرین نے پہلے کھیلتے ہوئے 47 رنز بنائے تاہم اے آئی ٹی وائٹ نے بہترین کھیل پیش کرتے ہوئے ہدف حاصل کر لیا۔ اے آئی ٹی وائٹ کی جانب سے کائنات، بسمہ اور حفصہ زوہیب نے شاندار کارکردگی دکھائی جبکہ اے آئی ٹی گرین کی جانب سے شائنہ نے نمایاں کھیل پیش کیا۔
تقریب کے دوران اے آئی ٹی انتظامیہ اور اے آئی ٹی اساتذہ کے درمیان دوستانہ نمائشی مقابلہ بھی منعقد ہوا۔ اساتذہ کی ٹیم نے پہلے کھیلتے ہوئے 74 رنز بنائے جبکہ انتظامیہ کی ٹیم مقررہ پانچ اوورز میں 49 رنز ہی بنا سکی، یوں اساتذہ نے 25 رنز سے کامیابی حاصل کی۔
مقابلے میں ظفر احمد اور وحید الرحمن کی شاندار ابتدائی شراکت توجہ کا مرکز بنی جنہوں نے ٹیم کو مضبوط آغاز فراہم کیا۔ ظفر احمد نے 34 رنز کی بہترین اننگز کھیل کر بہترین کھلاڑی کا اعزاز حاصل کیا جبکہ انتظامیہ کی جانب سے کپتان عمیر حسین نے بھی 34 رنز کی عمدہ اننگز کھیلی۔
اختتامی تقریب سے خطاب کرتے ہوئے کنوینر سید محمد محسن کاظم نے کہا کہ علیگڑھ انسٹیٹیوٹ طلبہ کو صحت مند تفریحی سرگرمیوں کے مواقع فراہم کرنے کے لیے ہر ماہ مختلف کھیلوں کے مقابلوں کا انعقاد کرتا ہے۔ انہوں نے کھیلوں کے افسر طلعت محمود اور معاون کھیل افسر عظمت پاشا کی خدمات کو بھی سراہا۔
پرنسپل شاہد جمیل نے اپنے خطاب میں کہا کہ ادارہ تعلیم کے ساتھ ساتھ کھیلوں کے فروغ پر بھی خصوصی توجہ دے رہا ہے کیونکہ کھیل طلبہ میں اعتماد، نظم و ضبط اور قائدانہ صلاحیتیں پیدا کرتے ہیں۔
چیمپئن شپ کے اختتام پر کامیاب ٹیموں اور نمایاں کارکردگی دکھانے والے کھلاڑیوں میں انعامات تقسیم کیے گئے جبکہ بی ایس سی ایس کی فتح پر طلبہ نے بھرپور جشن منایا۔
