نیویارک / نیو جرسی — عالمی کھیل اور تفریح کی تاریخ میں ایک شاندار اور یادگار اضافہ ہونے جا رہا ہے جہاں جنوبی کوریا کے مشہورِ زمانہ پاپ گروپ ‘بی ٹی ایس’ فیفا ورلڈ کپ 2026 کے فائنل میں ہونے والے پہلے ‘سپر باؤل اسٹائل’ ہاف ٹائم شو کی صدارت کریں گے۔ فٹ بال کی تاریخ کا یہ انوکھا اور تاریخی 11 منٹ کا میوزک شو اتوار، 19 جولائی 2026 کو نیویارک نیو جرسی اسٹیڈیم میں کھیلی جانے والے فائنل میچ کے دوران پیش کیا جائے گا، جو فائنل میچ کے سسپنس کو موسیقی کے رنگوں سے مزید دوبالا کر دے گا۔ بین الاقوامی پاپ گروپ بی ٹی ایس اس عالمی اسٹیج پر اکیلے نہیں ہوں گے بلکہ وہ دنیا کی نامور موسیقی کی شخصیات میڈونا، شکیرا اور جسٹن بیبر کے ہمراہ پرفارم کریں گے۔
فٹ بال کی عالمی تنظیم کی تاریخ میں یہ پہلا موقع ہے کہ فائنل میچ کے دوران امریکی فٹ بال لیگ کے ‘سپر باؤل’ کی طرز پر ایک باقاعدہ اور بڑے پیمانے پر ہاف ٹائم شو کا انعقاد کیا جا رہا ہے۔ اس میگا شو کے دوران بی ٹی ایس گروپ اپنا مشہورِ عالم اور ریکارڈ ساز گانا "پرمیشن ٹو ڈانس” (Permission to Dance) پیش کرے گا، جس میں ان کے روایتی رقص اور منفرد انداز کو اسٹیڈیم میں موجود لاکھوں اور ٹی وی اسکرینز پر موجود اربوں شائقینِ کھیل دیکھ سکیں گے۔ دنیا بھر کے موسیقی اور کھیل کے پنڈتوں کی جانب سے اس تاریخی اشتراک کو سراہا جا رہا ہے، اور ان کا ماننا ہے کہ کے-پاپ، لاطینی اور مغربی پاپ موسیقی کے ان بڑے ناموں کا ایک ساتھ آنا عالمی کپ کے کثیر الثقافتی رنگوں کی حقیقی عکاسی کرتا ہے۔
