اسلام آباد: چیئرمین پاکستان کرکٹ بورڈ محسن نقوی نے کہا ہے کہ ٹی 20 ورلڈ کپ 2026 میں پاکستان کی شرکت سے متعلق حتمی فیصلہ جمعہ یا پیر تک متوقع ہے۔
یہ بیان وزیر اعظم شہباز شریف سے اسلام آباد میں ہونے والی طویل ملاقات کے بعد سامنے آیا، جس میں ورلڈ کپ سے متعلق اہم امور پر تفصیلی غور کیا گیا۔
محسن نقوی کے مطابق وزیر اعظم نے ہدایت کی ہے کہ تمام ممکنہ آپشنز کو مدنظر رکھتے ہوئے معاملہ حل کیا جائے۔ ملاقات کے دوران چیئرمین پی سی بی نے آئی سی سی کے ساتھ ہونے والی پیش رفت پر وزیراعظم کو بریفنگ دی۔
ذرائع کے مطابق پاکستان نے بنگلادیش کے موقف کی بھرپور حمایت کی ہے اور بنگلادیش کو ایونٹ سے باہر کیے جانے پر آئی سی سی کے سامنے باقاعدہ احتجاج ریکارڈ کرانے کا فیصلہ کیا گیا ہے، جو خط کے ذریعے کیا جائے گا۔
ذرائع کا کہنا ہے کہ ملاقات میں آئی سی سی کے مبینہ دہرے معیار پر بھی بات ہوئی، جہاں بھارت کے لیے ایک اور دیگر ممالک کے لیے مختلف اصول اپنائے جانے کا مؤقف اختیار کیا گیا۔
ملاقات میں مختلف احتجاجی آپشنز پر غور کیا گیا، جن میں مکمل بائیکاٹ یا بھارت کے خلاف میچ نہ کھیلنے کی تجویز شامل تھی۔
پاکستان اور بھارت کا میچ 15 فروری کو کولمبو میں شیڈول ہے۔ ذرائع کے مطابق اس میچ سے دستبرداری کی صورت میں پاکستان کے صرف دو پوائنٹس کٹیں گے۔
ذرائع نے بتایا کہ پاک بھارت مقابلہ آئی سی سی ایونٹس کا سب سے بڑا اور منافع بخش میچ ہوتا ہے، جس کے نہ ہونے سے آئی سی سی کو بھاری مالی نقصان کا سامنا ہو سکتا ہے۔
وزیراعظم شہباز شریف نے چیئرمین پی سی بی پر مکمل اعتماد کا اظہار کرتے ہوئے کہا کہ حتمی فیصلہ پاکستان اور بنگلادیش کے مفاد کو سامنے رکھ کر کیا جائے گا۔
ملاقات کے اختتام پر محسن نقوی واپس روانہ ہوگئے، جبکہ فیصلہ آئندہ چند دنوں میں متوقع ہے۔
