فیڈرل انویسٹی گیشن ایجنسی (ایف آئی اے) نے لاہور میں مختلف کارروائیوں کے دوران غیر قانونی کرنسی ایکسچینج اور کاپی رائٹ خلاف ورزی میں ملوث چار افراد کو گرفتار کر لیا۔
ایف آئی اے حکام کے مطابق شاہد الیاس اور شاہد نذیر نامی دو ملزمان مبینہ طور پر غیر قانونی حوالہ ہنڈی اور کرنسی ایکسچینج کے کاروبار میں ملوث تھے۔ چھاپے کے دوران حکام نے 2 کروڑ 4 لاکھ روپے مالیت کی پاکستانی کرنسی سمیت امریکی ڈالر، آسٹریلوی ڈالر، یو اے ای درہم، برطانوی پاؤنڈ اور سعودی ریال بھی برآمد کیے۔ حکام نے غیر قانونی لین دین سے متعلق ریکارڈ اور ڈیجیٹل شواہد بھی قبضے میں لے لیے۔
ایک علیحدہ کارروائی میں ایف آئی اے نے نور المجتبیٰ اور ارسلان امتیاز کو کاپی رائٹ قوانین کی خلاف ورزی کے الزام میں گرفتار کیا۔ حکام کے مطابق ملزمان جعلی برانڈڈ مصنوعات تیار اور فروخت کر رہے تھے، جبکہ کارروائی کے دوران بڑی تعداد میں جعلی اشیا بھی برآمد کی گئیں۔
ایف آئی اے کا کہنا ہے کہ مقدمات درج کر کے مزید تحقیقات شروع کر دی گئی ہیں تاکہ نیٹ ورک سے وابستہ دیگر افراد کو بھی گرفتار کیا جا سکے۔
