عالمی امدادی ادارے پولیو وائرس کے مکمل خاتمے کے لیے پاکستان کے ساتھ شانہ بشانہ کھڑے ہیں۔ روٹری انٹرنیشنل نے پاکستان میں انسداد پولیو پروگرام کے لیے 9.9 ملین ڈالر کی خطیر رقم عطیہ کرنے کا اعلان کیا ہے، جو عالمی ادارہ صحت (ڈبلیو ایچ او) کے حوالے کر دی گئی ہے۔
ڈبلیو ایچ او کے مطابق اس گرانٹ کے ذریعے پاکستان کے ہائی رسک اضلاع میں انسداد پولیو مہمات چلائی جائیں گی، جن کے نتیجے میں ملک بھر میں تقریباً 27 ملین بچوں کو پولیو کے قطرے پلائے جائیں گے۔ اس امداد سے پاکستان میں انسداد پولیو کی سرگرمیوں کو مزید تقویت ملے گی۔
ترجمان ڈبلیو ایچ او کا کہنا ہے کہ روٹری انٹرنیشنل عالمی سطح پر انسداد پولیو اتحاد کا بانی رکن ہے اور گزشتہ تین دہائیوں سے پاکستان کے انسداد پولیو پروگرام کا اہم شراکت دار رہا ہے۔ ترجمان کے مطابق پاکستان میں انسداد پولیو پروگرام تین دہائیاں مکمل کر چکا ہے اور 1994 سے اب تک ملک میں پولیو کیسز میں 99.8 فیصد کمی واقع ہوئی ہے۔
ڈبلیو ایچ او کے اعداد و شمار کے مطابق گزشتہ برس پاکستان میں پولیو وائرس کے 31 کیسز رپورٹ ہوئے تھے، جبکہ 1988 سے اب تک عالمی سطح پر پولیو کیسز میں 99.9 فیصد کمی آئی ہے۔ اس وقت دنیا میں وائلڈ پولیو وائرس ٹائپ ون سے متاثرہ صرف دو ممالک پاکستان اور افغانستان ہیں۔
ترجمان کے مطابق روٹری انٹرنیشنل اب تک عالمی انسداد پولیو پروگرام کے لیے 3 ارب ڈالر فراہم کر چکا ہے، جن میں سے 500 ملین ڈالر پاکستان میں انسداد پولیو کی کوششوں کے لیے دیے جا چکے ہیں۔ روٹری انٹرنیشنل اور عالمی شراکت داروں کے تعاون سے پاکستان میں پولیو کے مکمل خاتمے کی کوششیں تیزی سے جاری ہیں۔
