اسلام آباد: گوگل نے پاکستان کے 79ویں یومِ آزادی کے موقع پر اپنے مرکزی صفحے کے روایتی لوگو کی جگہ خصوصی ڈوڈل پیش کردیا، جس میں پاکستان کا سبز و سفید قومی پرچم نمایاں کیا گیا ہے۔
خصوصی ڈوڈل میں پاکستانی پرچم بادل نما حروف کے درمیان لہراتا دکھائی دیتا ہے، جو مل کر “گوگل” کا نام بناتے ہیں۔ اس ڈیزائن نے گوگل کے ہوم پیج کو یومِ آزادی کے رنگوں سے آراستہ کردیا ہے۔
پاکستان ہر سال 14 اگست کو یومِ آزادی مناتا ہے، جو 1947 میں برطانوی راج سے آزادی حاصل کرنے اور ایک آزاد ریاست کے طور پر پاکستان کے قیام کی یاد میں منایا جاتا ہے۔
ملک بھر میں اس دن پرچم کشائی کی تقریبات، سرکاری خطابات، ملی نغموں اور مختلف قومی تقریبات کا انعقاد کیا جاتا ہے، جبکہ سرکاری عمارتوں، سڑکوں اور دیگر مقامات کو سبز و سفید رنگوں سے سجایا جاتا ہے۔
گوگل دنیا کے مختلف ممالک کے قومی دنوں، ثقافتی مواقع، تاریخی واقعات اور معروف شخصیات کو خراجِ تحسین پیش کرنے کے لیے خصوصی ڈوڈلز تیار کرتا ہے۔
رواں سال بھی گوگل نے پاکستان کے یومِ آزادی کے لیے اپنے ہوم پیج کو مخصوص کیا ہے۔ صارفین خصوصی ڈوڈل پر کلک کرکے پاکستان کی آزادی کی تاریخ اور ملک بھر میں جاری یومِ آزادی کی تقریبات سے متعلق معلومات حاصل کرسکتے ہیں۔
یومِ آزادی کی تقریبات میں اسلام آباد میں 31 توپوں کی سلامی، صدر مملکت اور وزیراعظم کے خصوصی خطابات اور ملک بھر میں مختلف عوامی پروگرام شامل ہیں۔ شہری سبز و سفید لباس پہن کر قومی پرچم، بینرز اور دیگر سجاوٹ کے ذریعے جشنِ آزادی مناتے ہیں۔
گوگل کا خصوصی ڈوڈل یومِ آزادی کے موقع پر ایک ڈیجیٹل خراجِ تحسین ہے، جو پاکستان اور دنیا بھر کے صارفین کو 14 اگست کی اہمیت اور پاکستان کے آزادی کے سفر سے آگاہ کرنے کا ذریعہ بھی بن رہا ہے۔
