پاکستانی اداکارہ صبا قمر کو حالیہ دنوں اُس وقت شدید ردِعمل کا سامنا کرنا پڑا جب انہوں نے ڈرامہ کیس نمبر 9 کی نئی قسط میں بغیر میک اپ نظر آنے کے بعد انسٹاگرام پر لکھا کہ ’’چلیں، اسکرین پر بغیر میک اپ آنے کو نارمل کریں‘‘۔ اُن کا یہ بیان سوشل میڈیا پر بحث کا باعث بنا اور متعدد صارفین نے اس سے اختلاف کرتے ہوئے سخت تبصرے کیے۔
صبا قمر، جو پانی جیسا پیار، باغی، بے شرم، چیخ، ڈائجسٹ رائٹر اور فراڈ جیسے مشہور ڈراموں میں قابلِ ذکر کردار ادا کر چکی ہیں، اس وقت دو کامیاب سیریلز کیس نمبر 9 اور پامال میں جلوہ گر ہیں۔ پامال میں اُن کی عثمان مختار کے ساتھ جوڑی کو پسند کیا جا رہا ہے، جبکہ کیس نمبر 9 میں ریپ سروائیور کا مضبوط کردار نبھانے پر انہیں خوب تعریف مل رہی ہے۔ اداکارہ اپنی کم سے کم میک اپ استعمال کرنے کی عادت کے لیے بھی جانی جاتی ہیں۔
تاہم، ’نو میک اپ‘ بیان پر صارفین نے اُنہیں تنقید کا نشانہ بنایا۔ ناقدین کا کہنا تھا کہ صبا قمر سمیت کئی فنکار مہنگے کاسمیٹک ٹریٹمنٹس، فلرز اور انجیکشن کرواتے ہیں، اس لیے بغیر میک اپ آنے کا دعویٰ حقیقت کے مطابق نہیں۔
کچھ صارفین نے طنز کرتے ہوئے کہا کہ ’’سرجریز اور فلرز کے بعد نو میک اپ آنا تو آسان ہوتا ہے‘‘ جبکہ بعض نے یہ بھی کہا کہ اداکارہ دراصل ہلکے میک اپ میں تھیں۔
ادھر شوبز انڈسٹری میں فطری خوبصورتی، میک اپ کلچر اور آن اسکرین حقیقی دکھائی دینے کے رجحان پر نئی بحث نے جنم لے لیا ہے۔
