اسلام آباد: اسلام آباد ہائیکورٹ نے گریڈ 17 سے گریڈ 22 تک کے عدالتی افسران اور عدالتی عملے کے لیے ٹرانسپورٹ مونیٹائزیشن الاؤنس میں نمایاں اضافے کی منظوری دے دی ہے۔
سرکاری اعلامیے کے مطابق نئے ٹرانسپورٹ الاؤنسز چیف جسٹس اسلام آباد ہائیکورٹ جسٹس سرفراز ڈوگر کی ہدایت پر منظور کیے گئے، جنہیں رجسٹرار اسلام آباد ہائیکورٹ کی جانب سے باقاعدہ طور پر جاری کر دیا گیا ہے۔
نئے الاؤنسز کا اطلاق یکم جولائی 2026 سے ہوگا۔ ترمیم شدہ شرح کے تحت گریڈ 22 کے افسران کو ماہانہ 2 لاکھ 50 ہزار روپے ٹرانسپورٹ مونیٹائزیشن الاؤنس دیا جائے گا، جبکہ گریڈ 21 کے افسران کے لیے یہ رقم ایک لاکھ 95 ہزار روپے مقرر کی گئی ہے۔
اسی طرح گریڈ 20 کے افسران کو ماہانہ ایک لاکھ 75 ہزار روپے، گریڈ 19 کو ایک لاکھ 50 ہزار روپے اور گریڈ 18 کے افسران کو ایک لاکھ روپے ٹرانسپورٹ الاؤنس ملے گا۔
گریڈ 17 کے افسران کے لیے ماہانہ ٹرانسپورٹ الاؤنس 60 ہزار روپے مقرر کیا گیا ہے۔
اعلامیے کے مطابق نظرثانی شدہ الاؤنسز کی مد میں اضافی اخراجات مالی سال 2026-27 کے لیے اسلام آباد ہائیکورٹ اور اسلام آباد ضلعی عدلیہ کے مختص بجٹ سے پورے کیے جائیں گے۔
نئے فیصلے کے تحت گریڈ 17 سے 22 تک کے عدالتی افسران اور متعلقہ عملے کو ٹرانسپورٹ کی مد میں پہلے کے مقابلے میں زیادہ مالی سہولت فراہم کی جائے گی۔
