بہاولپور: (نمائندہ خصوصی)
بھارت کی جانب سے دریائے ستلج میں پانی کے بڑے اخراج کے بعد پنجاب کے مختلف اضلاع میں سیلابی صورتحال سنگین ہوگئی ہے۔ بہاولپور، قصور، بہاولنگر اور پاکپتن کے کئی دیہات زیرِ آب آگئے جبکہ زرعی زمینوں اور فصلوں کو بھاری نقصان پہنچا ہے۔
محکمہ آبپاشی کے مطابق ہیڈ گنڈا سنگھ والا پر پانی کی سطح 21 اعشاریہ 80 فٹ ریکارڈ کی گئی جبکہ پانی کا اخراج ایک لاکھ 95 ہزار کیوسک تک پہنچ گیا ہے، جسے انتہائی اونچے درجے کا سیلاب قرار دیا جا رہا ہے۔ قریبی دیہات کے مکینوں کو فوری طور پر محفوظ مقامات کی جانب منتقل کیا جا رہا ہے۔
فلڈ فورکاسٹنگ سینٹر کے مطابق ہیڈ سلیمانکی پر درمیانے درجے کا سیلاب ہے جہاں پانی کی آمد ایک لاکھ چار ہزار کیوسک ریکارڈ کی گئی۔ ہیڈ اسلام پر بھی نچلے درجے کا سیلاب ہے اور پانی کی آمد 46 ہزار کیوسک تک جا پہنچی ہے۔
سیلابی ریلے کے باعث قصور اور بہاولنگر کے نشیبی دیہات میں کھڑی کپاس اور مکئی کی فصلیں برباد ہوگئیں۔ بہاولپور کے قریب زمندارہ بند ٹوٹنے سے ہزاروں ایکڑ اراضی پانی میں ڈوب گئی جبکہ ایمپرَس برج پر دباؤ میں اضافہ دیکھنے میں آیا ہے۔
