نومبر 4، 2025
ویب ڈیسک
استنبول، عراقی خطاط علی زمان نے چھ سال کی انتھک محنت کے بعد دنیا کا سب سے بڑا دستی طور پر لکھا گیا قرآن مجید مکمل کر لیا ہے۔ یہ شاہکار ترکی کے شہر استنبول میں تیار کیا گیا۔
سلیمانیہ (عراق) سے تعلق رکھنے والے علی زمان نے 2013 میں سنہری کاریگری چھوڑ کر مکمل طور پر خطاطی کو اپنا پیشہ بنا لیا۔ انہوں نے یہ عظیم قرآنی نسخہ ثلث خط میں قلم بند کیا، جس کے ہر صفحے کی لمبائی چار میٹر اور چوڑائی ڈیڑھ میٹر ہے۔
علی زمان نے یہ کام استنبول کے محرمہ سلطان مسجد کمپلیکس کے ایک چھوٹے سے کمرے میں اکیلے انجام دیا۔ منصوبہ مکمل طور پر ذاتی خرچ سے تیار کیا گیا، اور وہ صحت کے مسائل اور کووڈ-19 کی مشکلات کے باوجود اپنے کام سے نہیں رکے۔
علی زمان نے اناطولیہ ایجنسی سے گفتگو میں کہا،
“یہ صرف فن نہیں، عبادت ہے۔ ہر حرف میں صبر، عقیدہ اور محنت کی جھلک ہے۔”
یہ قرآن مجید اب اس سے پہلے موجود سب سے بڑے نسخے جس کے صفحات 2.28 میٹر لمبے اور 1.55 میٹر چوڑے تھے سے بھی بڑا ہے، اور اسلامی خطاطی کی تاریخ میں ایک نیا ریکارڈ قائم کر چکا ہے۔
