نومبر 4، 2025
ویب ڈیسک
خیبر پختونخوا کے اضلاع دیر اور سوات میں منگل کی صبح موسلا دھار بارش، ژالہ باری اور گرج چمک کے ساتھ موسم کی پہلی برفباری نے سردی کی شدت میں اضافہ کر دیا اور معمولاتِ زندگی متاثر ہو گئے۔
دیر کے بالائی اور زیریں علاقوں میں گہرے بادلوں نے آسمان کو ڈھانپے رکھا جبکہ وقفے وقفے سے ہونے والی شدید بارش اور ژالہ باری نے ندی نالوں میں طغیانی پیدا کر دی۔ جی ٹی روڈ سمیت کئی شاہراہوں پر ٹریفک متاثر ہوئی، جبکہ بعض مقامات پر لینڈ سلائیڈنگ اور سڑکوں کے کٹاؤ کے باعث شہری گھروں تک محدود ہو گئے۔
بارش اور ژالہ باری سے کھڑی فصلیں، پھلدار باغات اور متعدد گاڑیاں نقصان کا شکار ہوئیں۔ بجلی کی فراہمی بھی معطل ہو گئی جس کے باعث کئی علاقے اندھیرے میں ڈوب گئے۔ ضلعی انتظامیہ کے مطابق مرمت کا کام جاری ہے لیکن مسلسل بارش سے مشکلات پیش آ رہی ہیں۔
سوات میں بھی شدید بارش اور ژالہ باری کے بعد درجہ حرارت میں نمایاں کمی ریکارڈ کی گئی۔ مینگورہ شہر میں نالوں کے اُبل جانے سے سڑکیں پانی میں ڈوب گئیں، جبکہ صفائی کے ناقص انتظامات نے واٹر اینڈ سینی ٹیشن سروسز کمپنی (ڈبلیو ایس ایس سی) کی کارکردگی پر سوالیہ نشان
لگا دیا۔
