لندن — برطانیہ میں بدھ کے روز ریکارڈ توڑ گرمی پڑی اور محکمہ موسمیات کے مطابق جنوبی انگلینڈ میں درجہ حرارت 35.8 ڈگری سینٹی گریڈ (96.26 ڈگری فارن ہائیٹ) تک پہنچ گیا، جو ملکی تاریخ میں جون کے مہینے کا گرم ترین دن ہے۔
ابتدائی سرکاری اعداد و شمار کے مطابق، گرمی کا یہ نیا ریکارڈ انگلینڈ کے علاقے مغربی سسیکس کے مقام وگنہولٹ میں درج کیا گیا۔ اس سے قبل جون کے مہینے میں سب سے زیادہ درجہ حرارت 35.6 ڈگری سینٹی گریڈ تھا جو پہلی بار 1957 میں ریکارڈ ہوا تھا اور بعد میں 1976 میں بھی اتنا ہی درجہ حرارت دیکھا گیا تھا۔ برطانیہ میں موسم کا باقاعدہ ریکارڈ رکھنے کا سلسلہ 1884 میں شروع ہوا تھا۔
برطانیہ میں جون کی یہ شدید لہر مئی کے ریکارڈ توڑ گرم مہینے کے فوراً بعد آئی ہے، جہاں مئی میں تاریخ کا سب سے زیادہ درجہ حرارت 35.1 ڈگری سینٹی گریڈ ریکارڈ کیا گیا تھا۔ یاد رہے کہ برطانیہ کی تاریخ کا گرم ترین دن جولائی 2022 میں ریکارڈ کیا گیا تھا جب درجہ حرارت 40.3 ڈگری سینٹی گریڈ تک جا پہنچا تھا۔
مغرب یورپی ممالک کو لپیٹ میں لینے والی گرمی کی شدید لہر انگلش چینل کو عبور کرتے ہوئے اب شمال کی جانب پھیل رہی ہے، جس کے باعث حکام نے شہریوں کے لیے شدید ترین گرمی کا نایاب الرٹ جاری کیا ہے۔ محکمہ موسمیات کا کہنا ہے کہ یہ لہر جنوبی اور وسطی انگلینڈ سمیت ویلز کے کچھ حصوں کو متاثر کر رہی ہے، اور ہفتے کے وسط تک درجہ حرارت مزید بڑھ کر 39 ڈگری سینٹی گریڈ (102.2 ڈگری فارن ہائیٹ) تک پہنچنے کا امکان ہے، جس سے جون کے تمام پرانے ریکارڈز مکمل طور پر ٹوٹ جائیں گے۔
