امیر جماعتِ اسلامی حافظ نعیم الرحمان نے پیٹرولیم مصنوعات کی قیمتوں میں حالیہ اضافے پر حکومت کو شدید تنقید کا نشانہ بناتے ہوئے فیصلے کو عوام دشمن قرار دیا ہے۔
اپنے بیان میں حافظ نعیم الرحمان نے کہا کہ حکومت نے ایک بار پھر ایندھن کی بڑھتی قیمتوں کا بوجھ عام شہریوں پر ڈال دیا ہے۔ ان کا کہنا تھا کہ پیٹرول اور ڈیزل کی قیمتوں میں بار بار اضافے سے کرایوں، اشیائے خورونوش اور مجموعی مہنگائی میں مزید اضافہ ہوگا۔
امیر جماعتِ اسلامی نے مطالبہ کیا کہ حکومت پیٹرولیم مصنوعات کی قیمتوں میں اضافہ فوری واپس لے اور ان پر عائد ٹیکسز اور لیویز کم کرے۔ انہوں نے کہا کہ عوام پہلے ہی مہنگائی، مہنگی بجلی اور بڑھتے گھریلو اخراجات سے پریشان ہیں۔
حافظ نعیم الرحمان نے خبردار کیا کہ جماعتِ اسلامی عوام پر مالی بوجھ بڑھانے والی پالیسیوں کے خلاف آواز اٹھاتی رہے گی۔
