کراچی، 6 اگست 2026: کراچی انتظامیہ نے شہر میں ٹریفک کی روانی بہتر بنانے اور پبلک ٹرانسپورٹ کی سہولیات میں بہتری کے لیے ٹریفک سگنلز کو کمپیوٹرائز کرنے اور رکشوں میں ڈیجیٹل میٹر نصب کرنے کا فیصلہ کیا ہے۔
یہ فیصلے کراچی کمشنر حسن نقوی کی زیر صدارت ریجنل ٹرانسپورٹ اتھارٹی (آر ٹی اے) بورڈ کے اہم اجلاس میں کیے گئے۔
اجلاس کو بریفنگ میں بتایا گیا کہ شہر میں ٹریفک سگنلز کو کمپیوٹرائز کرنے کا کام شروع کر دیا گیا ہے، جس کا مقصد ٹریفک جام اور رش کو کم کرکے ٹریفک کی روانی بہتر بنانا ہے۔ منصوبے کے پہلے مرحلے میں شہر کے پانچ اہم ٹریفک سگنلز کو جدید نظام سے منسلک کیا جائے گا، جبکہ ابتدائی طور پر پی آئی ڈی سی، سندھ کلب اور آواری ٹاورز کے سگنلز پر یہ نظام نصب کیا جائے گا۔
کمشنر کراچی حسن نقوی نے اجلاس کو بتایا کہ شہر کے 16 غیر فعال ٹریفک سگنلز میں سے 12 کو دوبارہ فعال کر دیا گیا ہے۔
آر ٹی اے بورڈ نے رکشوں میں ڈیجیٹل میٹرز کی تنصیب کی بھی باقاعدہ منظوری دے دی۔ اس اقدام کا مقصد مسافروں سے کرائے کی وصولی میں شفافیت یقینی بنانا اور شہریوں کو بہتر سفری سہولت فراہم کرنا ہے۔
اجلاس میں کمشنر نے آر ٹی اے کو شہریوں کی سفری ضروریات کو مدنظر رکھتے ہوئے نئے بس روٹس شروع کرنے کی بھی ہدایت کی۔ ان روٹس کا مقصد پبلک ٹرانسپورٹ کے نظام کو بہتر بنانا اور شہریوں کو درپیش سفری مشکلات میں کمی لانا ہے۔
کراچی انتظامیہ کے مطابق یہ اقدامات شہر میں ٹریفک مینجمنٹ اور پبلک ٹرانسپورٹ کے نظام کو جدید اور مؤثر بنانے کی وسیع تر کوششوں کا حصہ ہیں۔
