آل راؤنڈر محمد نواز نے سال 2025ء میں پاکستان ٹی20 ٹیم کے لیے شاندار کارکردگی دکھاتے ہوئے ٹیم کے بہترین پرفارمر کا اعزاز اپنے نام کر لیا۔
31 سالہ لیفٹ آرم اسپنر اور لیفٹ ہینڈ بیٹر محمد نواز نے ہیڈ کوچ مائیک ہیسن کے اعتماد پر پورا اترتے ہوئے خاص طور پر ٹی20 فارمیٹ میں مسلسل زبردست پرفارمنس پیش کی۔
جولائی 2025ء میں فلوریڈا میں ویسٹ انڈیز کے خلاف سیریز میں انہوں نے 21.52 کی اوسط سے 7 شکار کیے اور مین آف دی سیریز رہے۔
اگست 2025ء میں شارجہ میں پاکستان، افغانستان اور یو اے ای کے درمیان سیریز میں 5 میچوں میں 120 رنز اور 10 وکٹیں حاصل کرکے دوبارہ بہترین کھلاڑی قرار پائے۔
نومبر 2025ء میں راولپنڈی میں پاکستان، سری لنکا اور زمبابوے کی ٹرائی سیریز میں بھی انہوں نے 52 رنز اور 10 وکٹیں لے کر ایک بار پھر پلیئر آف دی سیریز کا اعزاز حاصل کیا۔
سال 2025ء کے دوران محمد نواز نے 26 ٹی20 میچوں میں 4 مرتبہ مین آف دی میچ کا ایوارڈ جیتا۔
انہوں نے مجموعی طور پر 74.4 اوور کرواتے ہوئے 490 رنز دیے اور 13.16 کی اوسط سے سب سے زیادہ 36 وکٹیں اپنے نام کیں۔
بیٹنگ میں بھی ان کی کارکردگی قابلِ ذکر رہی، جہاں انہوں نے 19.05 کی اوسط کے ساتھ 362 رنز اسکور کیے۔ ان کا بہترین اسکور ناٹ آؤٹ 38 رہا جبکہ 138.16 کے اسٹرائیک ریٹ سے کھیلتے ہوئے انہوں نے 24 چوکے اور 21 چھکے لگائے۔
