Pakistan Medical and Dental Council نے میڈیکل اور ڈینٹل کالجوں میں داخلوں کے لیے منعقد ہونے والے MDCAT 2026 کے انعقاد کی تاریخ کا باضابطہ اعلان کر دیا ہے۔ کونسل کے مطابق ایم ڈی کیٹ 2026 کا امتحان 16 اگست 2026 (اتوار) کو ملک بھر میں ایک ہی روز منعقد ہوگا۔
پی ایم ڈی سی کی جانب سے جاری نوٹس کے مطابق MDCAT 2026 کا نصاب 2025 کے نصاب کے مطابق ہی برقرار رکھا گیا ہے، جس سے طلبہ اپنی موجودہ تیاری کو بغیر کسی بڑی تبدیلی کے جاری رکھ سکیں گے۔
حکام نے امیدواروں کو ہدایت کی ہے کہ رجسٹریشن، رول نمبر سلپس، امتحانی مراکز اور داخلہ پالیسی سے متعلق تازہ معلومات کے لیے پی ایم ڈی سی کی سرکاری ویب سائٹ پر نظر رکھیں۔
تعلیمی ماہرین کے مطابق امتحان کی تاریخ کا قبل از وقت اعلان طلبہ کو اپنی تیاری منظم کرنے اور وقت کا بہتر استعمال کرنے میں مدد دے گا۔ نئی پالیسی کے تحت ایم ڈی کیٹ کو انٹرمیڈیٹ (FSc) امتحانات کے بعد نسبتاً جلد منعقد کیا جا رہا ہے تاکہ میڈیکل کالجوں کے داخلہ عمل کو تیز اور مؤثر بنایا جا سکے۔
امیدواروں کو مشورہ دیا گیا ہے کہ سوشل میڈیا پر گردش کرنے والی غیر مصدقہ معلومات پر انحصار کرنے کے بجائے صرف سرکاری اعلانات کو ہی مستند سمجھیں۔
