سندھ کے سینیئر وزیر اور وزیر اطلاعات شرجیل انعام میمن نے کہا ہے کہ چیئرمین پیپلز پارٹی بلاول بھٹو زرداری نے سیلاب متاثرین کے لیے عالمی امداد کی بات وفاق سے کی تھی، کسی صوبے سے نہیں۔
کراچی میں پریس کانفرنس کرتے ہوئے شرجیل میمن نے کہا کہ ’’جب بھی بلاول وزیراعظم کی تعریف کرتے ہیں تو پنجاب حکومت کو اعتراض ہوتا ہے۔‘‘
انہوں نے کہا کہ سندھ حکومت نے وفاق سے اپیل کی ہے کہ آئی ایم ایف اور عالمی برادری سے سیلاب متاثرین کے لیے بات کرے۔ ’’بلاول بھٹو نے وفاق سے کہا کہ متاثرین کی مدد کے لیے عالمی امداد حاصل کی جائے۔‘‘
سندھ کے وزیر اطلاعات کا کہنا تھا کہ صوبائی حکومت کسان پیکیج پر 55 ارب روپے خرچ کرے گی، جس سے 4 لاکھ 4 ہزار سے زائد کسان فائدہ اٹھائیں گے۔ ان کے مطابق بلاول بھٹو کی پالیسی کا مقصد کسان، مزدور اور غریب کو سہولت دینا ہے۔
انہوں نے کہا کہ فوڈ سیکیورٹی کے لیے کسانوں کی مدد ضروری ہے۔ سندھ میں 22 لاکھ ایکڑ پر گندم کاشتکاری کا پروگرام شروع کیا جا رہا ہے۔ اس کے ساتھ 21 لاکھ گھروں کی تعمیر، آن لائن شکایتی نظام اور پنک اسکوٹی اسکیم بھی جاری ہے۔
شرجیل میمن نے کہا کہ پیپلز پارٹی سیلاب پر سیاست نہیں کر رہی بلکہ مشکل وقت میں پنجاب کے عوام کے ساتھ کھڑی ہے۔
