حکومت سندھ نے کابینہ میں بڑے پیمانے پر تبدیلیاں کرتے ہوئے متعدد وزرا کے قلمدان تبدیل کر دیے۔
سرکاری نوٹیفکیشن کے مطابق ناصر حسین شاہ کو وزیر بلدیات سندھ جبکہ سعید غنی کو لیبر، ہیومن ریسورس اور سوشل پروٹیکشن ڈپارٹمنٹ کا وزیر مقرر کیا گیا ہے۔ ناصر حسین شاہ اس سے قبل توانائی اور منصوبہ بندی و ترقی کے وزیر تھے، جبکہ سعید غنی وزارت بلدیات کے انچارج تھے۔
محمد اسمٰعیل راہو کو سندھ کابینہ میں بطور وزیر شامل کر لیا گیا ہے، جبکہ گیان چند ایسرانی وزیراعلیٰ سندھ کے مشیر برائے محکمہ بحالی مقرر ہوئے ہیں۔ جام خان شورو کو ایریگیشن کے ساتھ منصوبہ بندی و ترقی کا اضافی قلمدان بھی دے دیا گیا ہے۔
مخدوم محبوب الزماں کو محکمہ خوراک کا وزیر مقرر کیا گیا ہے اور ان سے محکمہ بحالی کی ذمہ داری واپس لے لی گئی ہے۔
وزیراعلیٰ سندھ کے چار خصوصی معاونین بھی تعینات کیے گئے ہیں جن میں ڈاکٹر شام سندر کے ایڈوانی، فراز عابد لاکھانی، محمد طارق حسن اور عطا محمد پنہور شامل ہیں۔
مزید برآں، محمد علی راشد کو معاون خصوصی برائے سائنس و آئی ٹی مقرر کیا گیا ہے، جبکہ عبدالجبار خان کو محکمہ خوراک سے ہٹا کر محکمہ بحالی کا معاون خصوصی بنا دیا گیا ہے۔ جین خان سرفراز کو سوشل پروٹیکشن کی جگہ آرکائیوز کا قلمدان دیا گیا ہے۔
