لاہور (نمائندہ خصوصی)
پنجاب میں شدید بارشوں اور کلاؤڈ برسٹ کے خدشات کے پیش نظر پروونشل ڈیزاسٹر مینجمنٹ اتھارٹی (پی ڈی ایم اے) نے آئندہ 24 گھنٹوں کے لیے ہائی الرٹ جاری کردیا ہے۔ حکام کے مطابق مون سون کا ساتواں اسپیل رواں سال کا سب سے طاقتور اسپیل قرار دیا جا رہا ہے، جس کے دوران بالائی پنجاب کے مختلف اضلاع میں طوفانی بارشیں متوقع ہیں۔
ترجمان پی ڈی ایم اے کے مطابق گزشتہ روز مری میں 28 ملی میٹر، راولپنڈی میں 22 ملی میٹر، جبکہ لاہور اور سیالکوٹ میں 11 ملی میٹر بارش ریکارڈ کی گئی۔ دریائے سندھ میں تربیلا اور تونسہ کے مقام پر نچلے درجے کا سیلاب ہے جبکہ کالاباغ اور چشمہ پر درمیانے درجے کی سیلابی صورتحال دیکھی جا رہی ہے۔ منگلا اور تربیلا ڈیم میں پانی کی سطح خطرناک حد کے قریب پہنچ چکی ہے۔
ڈی جی پی ڈی ایم اے عرفان علی کاٹھیا نے تمام ضلعی انتظامیہ کو ہدایت کی ہے کہ وہ ریسکیو ٹیموں اور مشینری کو الرٹ رکھیں۔ شہریوں کو ندی نالوں اور نشیبی علاقوں سے دور رہنے اور غیر ضروری سفر سے گریز کرنے کا مشورہ بھی دیا گیا ہے۔
پی ڈی ایم اے کی رپورٹ کے مطابق رواں مون سون سیزن میں اب تک پنجاب بھر میں 164 شہری جاں بحق اور 582 زخمی ہوچکے ہیں، جبکہ 216 مکانات کو جزوی یا مکمل نقصان پہنچا ہے۔
دوسری جانب خیبرپختونخوا میں بارشوں اور کلاؤڈ برسٹ کے نتیجے میں ہلاکتوں کی تعداد 307 تک پہنچ گئی ہے، جن میں خواتین اور بچے بھی شامل ہیں۔ صوبائی حکومت کے مطابق امدادی کارروائیاں جاری ہیں اور متاثرہ علاقوں میں ریسکیو ٹیمیں تعینات کر دی گئی ہیں۔
