انسداد ڈینگی مہم کے دوران غیر حاضر رہنے والے ورکرز اور سپر وائزرز کو نوکری سے برطرف کردیا گیا۔
محکمہ صحت کے حکام نے بتایا کہ راولپنڈی میں انسداد ڈینگی مہم کے دوران غفلت برتی گئی، ورکرز اور سپر وائزرز مہم پر نہیں گئے اور غیر حاضر رہے، یہ اہلکار جعلی تصاویر افسران کو بھیجتے رہے اور حاضریاں لگواتے رہے۔
حکام کا کہنا ہے کہ غفلت، غیر حاضری پر محکمہ صحت نے 12 خواتین اورمرد ورکرز سمیت سپر وائزرز کو نوکری سے برطرف کردیا جب کہ اس حوالے سے مزید تحقیقات جاری ہیں۔
محکمہ صحت کے مطابق شہر سے اب تک مجموعی طور پر 374 کیسز رپورٹ ہوچکے ہیں، ان میں سے 82 مریض اس وقت مختلف ہسپتالوں میں زیرِ علاج ہیں۔
محکمہ صحت کی جانب سے ڈینگی کے پھیلاؤ کو روکنے کے لیے اب تک 13 لاکھ 6 ہزار 235 مقامات کی جانچ پڑتال کی گئی ہے جن میں سے ایک لاکھ 45 ہزار 575 مقامات سے ڈینگی لاروا برآمد ہوا ہے۔
ایس او پیز کی خلاف ورزی پر 3 ہزار 845 مقدمات درج کیے گئے جبکہ ایک ہزار 677 مقامات کو سیل کردیا گیا، اس کے ساتھ ساتھ 3 ہزار 285 چالان جاری کیے گئے اور 97 لاکھ 61 ہزار 7 روپے جرمانہ بھی عائد کیا گیا ہے۔
