ریاض: سعودی عرب نے اسرائیلی وزراء کی جانب سے مقبوضہ مغربی کنارے پر مکمل خودمختاری نافذ کرنے کے مطالبات کی شدید مذمت کی ہے۔
سعودی وزارت خارجہ کی جانب سے جاری کردہ بیان میں کہا گیا کہ ”مملکت ان بیانات کی سختی سے مذمت اور مخالفت کرتی ہے“ جو اسرائیلی حکام نے فلسطینی سرزمین پر خودمختاری نافذ کرنے کے حوالے سے دیے۔
بیان میں ان اقدامات کو بین الاقوامی قوانین کی کھلی خلاف ورزی اور مشرقِ وسطیٰ میں پائیدار امن کی کوششوں میں رکاوٹ قرار دیا گیا۔
سعودی عرب نے فلسطینی عوام کے جائز حقوق اور ایک آزاد فلسطینی ریاست کے قیام کی حمایت کا اعادہ کیا، جس کا دارالحکومت مشرقی یروشلم ہو، جیسا کہ بین الاقوامی قراردادوں اور عرب امن منصوبے میں درج ہے۔
مملکت نے عالمی برادری سے بھی مطالبہ کیا کہ وہ اسرائیل کو اس کی جارحیت اور بین الاقوامی قوانین کی خلاف ورزیوں پر جوابدہ بنائے۔
