ارسلان خٹک
2 جولائی 2025،
کراچی:
حکومتِ سندھ نے 9 اور 10 محرم الحرام 1447 ہجری بمطابق 5 اور 6 جولائی (ہفتہ اور اتوار) کو صوبے بھر میں عام تعطیلات کا اعلان کر دیا ہے۔
سرکاری نوٹیفکیشن محکمہ سروسز، جنرل ایڈمنسٹریشن و کوآرڈینیشن کی جانب سے یکم جولائی کو جاری کیا گیا، جس کے مطابق یہ چھٹیاں تمام سرکاری دفاتر، خودمختار اور نیم خودمختار اداروں، کارپوریشنز اور مقامی حکومتوں پر لاگو ہوں گی جو حکومت سندھ کے زیرِ انتظام کام کرتی ہیں۔ البتہ ضروری خدمات فراہم کرنے والے ادارے معمول کے مطابق کھلے رہیں گے۔
چیف سیکریٹری سندھ، آصف حیدر شاہ نے اس فیصلے کا اعلان کرتے ہوئے تمام متعلقہ محکموں کو ہدایت کی کہ تعطیلات کا اطلاق یقینی بنایا جائے۔
یومِ عاشورہ عالمِ اسلام میں نہایت اہمیت رکھتا ہے اور یہ حضرت امام حسینؓ اور ان کے ساتھیوں کی میدانِ کربلا میں شہادت کی یاد میں منایا جاتا ہے۔
ان دو دنوں کے دوران سندھ بھر میں سیکیورٹی کے سخت انتظامات کیے جائیں گے جبکہ جلوس اور مذہبی اجتماعات کا انعقاد بھی ہوگا ہے۔ انتظامیہ نے عوام سے اپیل کی ہے کہ وہ ان ایام کو مذہبی عقیدت اور احترام کے ساتھ منائیں اور امن و امان برقرار رکھنے کے لیے قانون نافذ کرنے والے اداروں سے تعاون کریں۔
