امریکی صدر ڈونلڈ ٹرمپ اور معروف ٹیکنالوجی ارب پتی ایلون مسک کے درمیان سیاسی اتحاد اب ایک کھلی جنگ میں بدل چکا ہے۔ دونوں رہنما سوشل میڈیا پلیٹ فارمز پر ایک دوسرے پر تنقید کے نشتر برسا رہے ہیں۔ معاملہ اس وقت شدت اختیار کر گیا جب مسک نے ٹرمپ کی اقتصادی پالیسی پر کڑی تنقید کی، جس کے بعد ٹرمپ نے بھی جوابی حملہ کیا۔
دن کی شروعات ٹرمپ کے اس بیان سے ہوئی کہ وہ مسک کے تبصروں پر “مایوس” ہیں اور ان کے بقول یہ شاید ان کے “عظیم تعلق” کا اختتام ہے۔
اس کے جواب میں مسک نے ٹرمپ کو “ناشکرا” قرار دیا اور لکھا:
"میرے بغیر، ٹرمپ الیکشن ہار چکے ہوتے۔”
بجٹ بل پر تنازع
تنازع کا مرکزی نکتہ امریکی ایوانِ نمائندگان سے منظور ہونے والا وہ بجٹ بل ہے جسے مسک نے “شرمناک اور خطرناک” قرار دیا۔ سابق مشیر اور Doge (محکمہ سرکاری کفایت شعاری) کے سابق سربراہ کی حیثیت سے، مسک نے اس بل کی کھلے عام مخالفت کی اور اسے قومی قرض میں اضافے کا ذریعہ قرار دیا۔
مسک نے اپنے پلیٹ فارم X پر عوام سے اپیل کی کہ وہ اپنے نمائندوں کو فون کریں اور اس “خرچوں کے پہاڑ” کی مخالفت کریں۔
ٹرمپ کا کہنا ہے کہ مسک اصل میں برقی گاڑیوں پر سبسڈی ختم ہونے پر ناراض ہیں، کیونکہ اس سے ان کی کمپنی Tesla متاثر ہو سکتی ہے۔ مسک نے ان الزامات کو رد کرتے ہوئے کہا:
"EV سبسڈی ختم کریں لیکن تیل اور گیس کی سبسڈی کو بھی روکیں – یہی اصل انصاف ہے!”
📉 سیاسی تنقید سے کاروباری جھٹکا
مسک نے ایک قدم آگے بڑھتے ہوئے ٹرمپ پر الزام لگایا کہ ان کا عالمی تجارتی منصوبہ معیشت کو مندی کی طرف لے جائے گا، اور بغیر ثبوت دعویٰ کیا کہ ٹرمپ کا نام جیفری ایپسٹین کی غیر شائع شدہ فائلز میں شامل ہے۔
ٹرمپ نے اپنے سوشل نیٹ ورک "ٹروتھ سوشل” پر جواب دیتے ہوئے کہا:
"ایلون تو پاگل ہو گیا ہے۔ بجٹ بچانے کا آسان حل ہے: اس کی سبسڈی اور سرکاری معاہدے ختم کر دو!”
جواب میں مسک نے اعلان کیا کہ SpaceX اب اپنے Dragon خلائی جہاز کو بند کر دے گا، جو NASA کے ساتھ خلائی مشن میں استعمال ہوتا ہے۔
ان الزامات اور بیانات کے اثرات فوری طور پر سامنے آئے اور Tesla کے شیئرز 14 فیصد تک گر گئے۔
قومی قرض اور صحت کی سہولیات
کانگریشنل بجٹ آفس کے مطابق یہ بل اگلے 10 سالوں میں امریکی قومی قرض میں 2.4 ٹریلین ڈالر اضافہ کرے گا اور تقریباً 1 کروڑ 10 لاکھ افراد اپنی صحت کی انشورنس سے محروم ہو جائیں گے۔ وائٹ ہاؤس نے ان اعداد و شمار کو مسترد کرتے ہوئے کہا کہ نئے محصولات اس خسارے کو پورا کریں گے۔
