اسلام آباد — برطانیہ کا ویزا حاصل کرنے کے خواہشمند پاکستانی شہری اب کسی ایجنٹ یا مڈل مین کے بغیر گھر بیٹھے براہِ راست آن لائن درخواست دے سکتے ہیں۔ برطانوی ہائی کمیشن نے تصدیق کی ہے کہ ویزا کے طریقہ کار کو مکمل طور پر ڈیجیٹلائز کر دیا گیا ہے، جس کے تحت اب فارم بھرنے، فیس کی ادائیگی اور بائیومیٹرک کی بکنگ جیسے تمام مراحل برطانوی حکومت کی آفیشل ویب سائٹ کے ذریعے خود مکمل کیے جا سکتے ہیں۔
پاکستان میں تعینات برطانوی ہائی کمشنر جین میریٹ نے پاکستانی شہریوں کو مشورہ دیا ہے کہ وہ ویزا کے لیے کسی تیسرے فریق پر انحصار کرنے کے بجائے براہِ راست سرکاری ذرائع استعمال کریں۔ انہوں نے کہا کہ اس آن لائن نظام کو انتہائی سادہ اور آسان بنایا گیا ہے تاکہ عام درخواست گزار اسے بغیر کسی الجھن کے خود استعمال کر سکیں اور ایجنٹوں کے ہاتھوں لٹنے سے بچ سکیں۔
ویزے کے حصول کے لیے درخواست گزاروں کو سب سے پہلے برطانوی حکومت کی آفیشل ویب سائٹ (GOV.UK) پر جا کر “Apply to come to the UK” کا آپشن منتخب کرنا ہوگا۔ پہلا اہم مرحلہ اپنے سفر کے مقصد کے مطابق درست ویزا کیٹیگری کا انتخاب کرنا ہے؛ عام طور پر سیاحت، دوستوں یا رشتہ داروں سے ملاقات کے لیے ‘اسٹینڈرڈ وزٹر ویزا’ (Standard Visitor Visa) استعمال کیا جاتا ہے۔ حکام کے مطابق، ویزا کے لیے سفر کی متوقع تاریخ سے تین ماہ قبل درخواست جمع کروائی جا سکتی ہے۔
اس ڈیجیٹل نظام کے تحت درخواست گزاروں کو اپنے سفری منصوبے، مالیاتی تفصیلات (بینک اسٹیٹمنٹ) اور ذاتی پس منظر سے متعلق معلومات فراہم کرنی ہوتی ہیں۔ پورٹل میں ڈیٹا کو محفوظ (Save) کرنے کی سہولت بھی موجود ہے، یعنی اگر فارم ادھورا رہ جائے تو اسے بعد میں کسی بھی وقت دوبارہ لاگ ان کر کے مکمل کیا جا سکتا ہے۔ فارم جمع کروانے اور آن لائن ویزا فیس ادا کرنے کے بعد، درخواست گزار کو اپنی شناخت کی تصدیق کے لیے ویزا فیسیلیٹیشن سروسز (VFS Global) کے مرکز کا انتخاب کر کے بائیومیٹرک (انگلیوں کے نشانات اور تصویر) کا وقت بک کرنا ہوگا، جو کہ اس عمل کا آخری مرحلہ ہے۔
