پنجاب میں ایک بار پھر جعلی ادویات کے خلاف بڑا کریک ڈاؤن کیا گیا۔ اس کارروائی میں پنجاب ڈرگ کنٹرول ڈائریکٹوریٹ نے بخار، گلے، فنگل انفیکشن اور امراض نسواں کے علاج کے لیے استعمال کی جانے والی جعلی ادویات پکڑ لیں۔
پنجاب ڈرگ کنٹرول ڈائریکٹوریٹ کی درخواست پر ڈریپ نے اس حوالے سے ریپڈ الرٹ بھی جاری کر دیا ہے جس میں کہا گیا ہے کہ پنجاب ڈرگ ٹیسٹنگ لیب نے 5 ادویات کے 5 بیچ جعلی قرار دیے ہیں۔
ڈریپ الرٹ کے مطابق ادویات ڈرگ ایکٹ 1976 سیکشن 3 کے تحت جعلی قرار پائی ہیں۔ مذکورہ جعلی ادویات مقامی فارما کمپنیز کے برانڈز کے ناموں پر تیار کردہ ہیں اور ان دواؤں کے لیبلز پر کراچی، لاہور، فیصل آباد اور سرگودھا کے پتے درج ہیں۔
ڈریپ نے جعلی ادویات کی تفصیلات بتاتے ہوئے کہا ہے کہ پیراسٹامول ایکسٹرا سیرپ 1000 ایم ایل بیچ ایم ٹی 357 جعلی ہے۔ اس کے علاوہ گلے کے انفیکشن کے علاج کے لیے استعمال ہونے والی گولی کلیریسڈ 500 ایم جی بیچ 722269 بھی جعلی ہے۔
بخار، جسم درد کا سسپنشن کیریفن 450 ایم ایل بیچ سی این 37، فنگل انفیکشن کی گولی ٹربیسل 250 ایم جی بیچ 473 اور امراض نسواں کی ٹیبلٹ ڈروپھا 10 ایم جی بیچ ڈی آر پی 0005 یہ تمام ادویات جعلی ہیں۔
ڈریپ الرٹ میں کہا گیا ہے جعلی ادویات کی تیاری میں خام مال استعمال نہیں ہوتا ہے۔ ان کی افادیت غیر واضح جب کہ استعمال جان لیوا ہو سکتا ہے۔ غیر معیاری ادویات کے استعمال سے علاج میں ناکامی بھی ہو سکتی ہے۔
ڈریپ الرٹ میں کہا گیا ہے جعلی ادویات کی تیاری میں خام مال استعمال نہیں ہوتا ہے۔ ان کی افادیت غیر واضح جب کہ استعمال جان لیوا ہو سکتا ہے۔ غیر معیاری ادویات کے استعمال سے علاج میں ناکامی بھی ہو سکتی ہے۔
ڈریپ نے پنجاب حکومت کو غیر معیاری ادویات کی روک تھام کے لیے ہنگامی اقدامات کرنے، ڈریپ ریگولیٹری فورس، پنجاب ڈرگ کنٹرول ڈائریکٹوریٹ مارکیٹ کی سرویلنس بڑھانے اور صوبے میں جعلی ادویات کی سپلائی چین کی جامع تحقیقات کی ہدایات کی ہیں۔
ڈریپ نے پنجاب حکومت کو واضح طور پر کہا ہے کہ وہ ریگولیٹری فورس کے ذریعہ مارکیٹ سے جعلی ادویات کا خاتمہ یقینی بنائے۔ مارکیٹوں میں دستیاب جعلی ادویات کے بیچ ضبط کیے جائیں۔ جعلی ادویات کے حوالے سے ڈسٹری بیوٹرز اور میڈیکل اسٹورز بھی فوری اطلاع دیں۔
