لاہور: سی سی ڈی پولیس کے مختلف علاقوں میں چار مبینہ مقابلے ہوئے جن میں 6 ملزمان ہلاک ہوگئے۔ پولیس کے مطابق مقابلے نشتر کالونی، گرین ٹاؤن، ہربنس پورہ اور رنگ روڈ کے قریب پیش آئے۔ ہلاک ملزمان سنگین جرائم میں ملوث تھے۔
پولیس کے مطابق گرین ٹاؤن میں زیرِ حراست ملزم علی اسد کو نشاندہی کے لیے لے جایا گیا تو اس کے ساتھیوں نے پولیس پارٹی پر فائرنگ کر دی۔ جوابی فائرنگ کے تبادلے میں علی اسد اپنے ہی ساتھیوں کی گولی سے زخمی ہوا اور دورانِ اسپتال منتقلی دم توڑ گیا۔
نشتر کالونی کے قریب سی سی ڈی ماڈل ٹاؤن ٹیم نے مشکوک موٹر سائیکل سواروں کو رکنے کا اشارہ کیا تو ملزمان نے پولیس پر فائرنگ کر دی۔ جوابی کارروائی میں دو ملزمان، ولی داد اور محسن، ہلاک جبکہ ان کے چار ساتھی فرار ہوگئے۔
رنگ روڈ کے قریب سی سی ڈی سول لائنز ٹیم نے ملزمان کو شہریوں سے لوٹ مار کرتے دیکھا۔ پولیس کو دیکھ کر ملزمان نے فائرنگ کر دی جس پر جوابی کارروائی میں دو ملزمان قیصر عرف ڈی سی اور رضا مارے گئے جبکہ دو فرار ہوگئے۔
ہربنس پورہ ریلوے پھاٹک کے قریب بھی مبینہ پولیس مقابلہ ہوا، جس میں ملزم انس زخمی ہوا اور بعد ازاں اسپتال میں زخموں کی تاب نہ لاتے ہوئے جاں بحق ہوگیا۔
پولیس کا کہنا ہے کہ تمام ہلاک ملزمان کے خلاف مختلف تھانوں میں سنگین نوعیت کے مقدمات درج تھے۔ لاشوں کو پوسٹ مارٹم کے لیے مردہ خانے منتقل کردیا گیا ہے جبکہ فرار ملزمان کی تلاش کے لیے سرچ آپریشن جاری ہے۔
