کراچی— ایف آئی اے کمپوزٹ سرکل گوادر نے کارروائی کرتے ہوئے سمندر کے راستے غیر قانونی طور پر ایران جانے کی کوشش کرنے والے 14 افراد کو حراست میں لے لیا۔
ترجمان ایف آئی اے کے مطابق گرفتار افراد پنجاب اور خیبر پختونخوا کے مختلف اضلاع سے تعلق رکھتے ہیں۔ گرفتار شدگان میں چار کا تعلق گوجرانوالہ، جب کہ فیصل آباد اور حافظ آباد سے دو دو افراد شامل ہیں۔ پانچ افراد لوئر دیر اور باقی تین افراد صوابی، مردان اور مالاکنڈ کے مختلف علاقوں سے تعلق رکھتے ہیں۔ ملزمان کو جیوانی سے گرفتار کیا گیا۔
ابتدائی تفتیش میں معلوم ہوا کہ ملزمان ایران کے راستے دیگر ممالک میں غیر قانونی طور پر داخل ہونا چاہتے تھے۔ ایف آئی اے کے مطابق ملزمان کے خلاف مقدمہ درج کر کے تفتیش شروع کر دی گئی ہے۔
ترجمان کا کہنا ہے کہ انسانی اسمگلنگ اور غیر قانونی بارڈر کراسنگ میں ملوث عناصر کے خلاف کریک ڈاؤن جاری ہے اور اس سلسلے میں تمام دستیاب وسائل بروئے کار لائے جا رہے ہیں۔
