کراچی : نیشنل کمیشن فار ہیومن رائٹس (NCHR) کے سیکریٹری جنرل غلام محمد نے آج مرکزی جیل کراچی اور خواتین جیل کا دورہ کیا۔ اس موقع پر ڈپٹی انسپکٹر جنرل جیل خانہ جات سندھ، اعجاز علی شیخ، اور سپرنٹنڈنٹ جیل نے کمیشن کو جیلوں کے نظام، قیدیوں کی فلاحی سہولیات، اور اصلاحی پروگراموں کے بارے میں بریفنگ دی۔
غلام محمد نے جیلوں میں انسانی حقوق کے تحفظ، اصلاحی سرگرمیوں اور قیدیوں کی بہتر بحالی کے لیے کیے گئے اقدامات کو سراہا اور کہا کہ سندھ حکومت اور محکمہ جیل خانہ جات کی جانب سے اصلاحی نظام میں نمایاں بہتری آئی ہے۔
انہوں نے کہا کہ “نئی جیلوں کی تعمیر، موجودہ جیلوں کی بحالی اور انسانی حقوق کے تحفظ کے لیے سندھ حکومت کے اقدامات قابلِ تحسین ہیں۔”
دورے کے دوران غلام محمد نے خواتین جیل کا بھی معائنہ کیا، جہاں خواتین قیدیوں اور بچوں کے لیے قائم سہولیات کا جائزہ لیا۔ انہوں نے کہا کہ جیلوں میں اصلاحی نظام کا نفاذ، انسانی وقار کے تحفظ کی جانب ایک مثبت قدم ہے۔
ترجمان محکمہ جیل خانہ جات سندھ، بلال کمیل، نے کہا کہ نیشنل کمیشن کا دورہ جیلوں میں شفافیت، اصلاحات اور بہتر انتظامی نظام کے عزم کی علامت ہے۔
