کراچی – میمن گوٹھ پولیس نے تین خواجہ سراؤں کے قتل کا معمہ حل کرتے ہوئے واردات میں ملوث تین ملزمان کو گرفتار کرلیا۔
ترجمان ڈسٹرکٹ ملیر پولیس کے مطابق گزشتہ ماہ 20 اور 21 ستمبر کی درمیانی شب ناگوری سوسائٹی سروس روڈ کے قریب جھاڑیوں سے تین خواجہ سراؤں کی لاشیں ملی تھیں جنھیں فائرنگ کر کے قتل کیا گیا تھا۔ میمن گوٹھ تھانے میں نامعلوم ملزمان کے خلاف قتل کی دفعات 302 اور 34 کے تحت مقدمہ درج کیا گیا تھا۔
پولیس نے خفیہ معلومات اور تکنیکی شواہد کی بنیاد پر کارروائی کرتے ہوئے تین ملزمان، سکندر جمالی، سہیل اور سکندر علی لاشاری کو گرفتار کرلیا۔
ترجمان کے مطابق گرفتار ملزمان نے دورانِ تفتیش انکشاف کیا کہ وہ واردات کے وقت نشے کی حالت میں تھے اور اسی حالت میں فائرنگ کے نتیجے میں تینوں خواجہ سرا موقع پر ہی جاں بحق ہوگئے۔ گرفتار سہیل کا تعلق کراچی سے جبکہ دیگر دو ملزمان کا تعلق اندرون سندھ سے ہے۔
پولیس حکام کا کہنا ہے کہ ملزمان اسٹریٹ کرائمز اور دیگر جرائم میں بھی ملوث رہے ہیں، ان کے کرمنل ریکارڈ کی جانچ جاری ہے جبکہ دیگر ساتھیوں کی گرفتاری کے لیے چھاپے مارے جا رہے ہیں۔ مزید تفتیش جاری ہے۔
