کراچی – اینٹی نارکوٹکس فورس (اے این ایف) نے ملک کے مختلف شہروں میں کریک ڈاؤن کرتے ہوئے پانچ کارروائیوں کے دوران پانچ ملزمان کو گرفتار کرلیا اور 271.7 کلوگرام منشیات برآمد کرلی، جس کی مالیت 6 کروڑ 20 لاکھ روپے سے زائد بتائی جاتی ہے۔
ترجمان اے این ایف کے مطابق حیدرآباد میں ایک ملزم کے قبضے سے 24 کلوگرام چرس برآمد ہوئی۔ شیر شاہ ٹول پلازہ ملتان کے قریب 1,452 سیبوں کے کارٹنز سے 8 کلوگرام آئس برآمد کی گئی اور دو ملزمان کو گرفتار کیا گیا۔
موٹر وے ٹول پلازہ اسلام آباد کے قریب گاڑی سے 3 کلوگرام ہیروئن برآمد کرکے دو افراد کو گرفتار کیا گیا، جبکہ کچلاک بائی پاس کوئٹہ کے قریب صحرائی علاقے سے 225 کلوگرام افیون اور جیونی، گوادر کی جھاڑیوں سے 11.7 کلوگرام ویڈ برآمد ہوئی۔
ترجمان نے مزید بتایا کہ گرفتار ملزمان کے خلاف انسدادِ منشیات ایکٹ 1997 کے تحت مقدمات درج کر کے تحقیقات شروع کر دی گئی ہیں۔
