بھکر میں اشتہاری ملزم کی گرفتاری کے لیے کیے گئے پولیس چھاپے کے دوران فائرنگ کے تبادلے میں 7 سالہ بچی جاں بحق جبکہ ایک پولیس اہلکار زخمی ہو گیا۔
پولیس کے مطابق واقعہ بھکر کے علاقے منگو چنگڑ میں پیش آیا، جہاں سی سی ڈی پولیس نے اقدامِ قتل کے مقدمے میں مطلوب اشتہاری ملزم کی گرفتاری کے لیے اس کے گھر پر چھاپا مارا۔
پولیس کا کہنا ہے کہ کارروائی کے دوران اچانک فائرنگ کا تبادلہ ہوا، جس کے نتیجے میں موقع پر موجود کمسن بچی جان سے ہاتھ دھو بیٹھی، جبکہ ایک پولیس اہلکار زخمی ہو گیا۔
اسی دوران اشتہاری ملزم فرار ہونے میں کامیاب ہو گیا، جس کی گرفتاری کے لیے مختلف مقامات پر چھاپے مارے جا رہے ہیں۔ پولیس کے مطابق واقعے کی مزید تحقیقات جاری ہیں۔
