پشاور – خیبر پختونخوا میں رواں سال کے دوران دہشتگردی کے مختلف واقعات میں 298 پولیس اہلکار اور عام شہری شہید ہوئے، جبکہ 368 دہشتگردوں کو ہلاک اور 1124 کو گرفتار کیا گیا ہے۔ یہ اعداد و شمار محکمہ انسدادِ دہشتگردی (سی ٹی ڈی) کی تازہ رپورٹ میں جاری کیے گئے ہیں۔
رپورٹ کے مطابق گزشتہ 295 دنوں کے دوران دہشتگردی کے واقعات میں 117 پولیس اہلکار اور 181 عام شہری شہید ہوئے جبکہ 486 افراد زخمی ہوئے۔
سی ٹی ڈی رپورٹ میں بتایا گیا کہ صوبے بھر میں 2 ہزار 366 انٹیلیجنس بیسڈ آپریشنز کے دوران 368 دہشتگرد مارے گئے اور 1124 گرفتار ہوئے۔
مزید بتایا گیا کہ دہشتگردی کے مقدمات میں 6 ہزار 181 ملزمان کو نامزد کیا گیا۔
رپورٹ کے مطابق رواں سال بھتہ خوری کے 1287 مقدمات بھی درج ہوئے جن میں 209 ملزمان کو نامزد اور 52 کو گرفتار کیا گیا۔
