واٹس ایپ جلد ہی ایک نیا سیکیورٹی فیچر متعارف کرانے جا رہا ہے جس کے تحت صارفین اپنا یوزر نیم بنانے کے ساتھ ساتھ ایک پن کوڈ بھی سیٹ کر سکیں گے۔ یہ نیا فیچر، جو اینڈرائیڈ کے تازہ ترین بیٹا ورژن 2.25.17.48 میں دیکھا گیا ہے، صارفین کو غیر ضروری یا اسپیم پیغامات سے محفوظ رکھنے کے لیے ڈیزائن کیا گیا ہے۔
اس فیچر کے ذریعے صارفین اپنی پرائیویسی کو مزید بہتر بنا سکیں گے، کیونکہ اب انہیں چیٹ کے لیے اپنا فون نمبر شیئر کرنے کی ضرورت نہیں ہوگی۔ صارف محض ایک منفرد یوزر نیم بنا کر دوسروں سے رابطہ کر سکے گے، لیکن اگر وہ چاہے تو اس یوزر نیم کو ایک پن کوڈ کے ذریعے محفوظ بھی کر سکتے ہے۔
نئے نظام کے مطابق، اگر کوئی شخص کسی کا یوزر نیم جان بھی لے، تب بھی وہ اس وقت تک پیغام نہیں بھیج سکے گا جب تک کہ اسے متعلقہ پن کوڈ کا بھی علم نہ ہو۔ اس سے ناپسندیدہ افراد کی جانب سے رابطہ کرنے کے امکانات میں نمایاں کمی آئے گی۔
واٹس ایپ یہ بھی پلان کر رہا ہے کہ جیسے ہی کوئی صارف اپنا یوزر نیم سیٹ کرے گا، اسے ایک انفارمیشنل بینر کے ذریعے پن کوڈ سیٹ کرنے کی یاد دہانی کرائی جائے گی تاکہ وہ اپنی پرائیویسی مزید محفوظ بنا سکے۔
یہ فیچر خاص طور پر ان صارفین کے لیے مفید ہوگا جو آسان یا عام یوزر نیم استعمال کرتے ہیں، کیونکہ ایسے یوزر نیم آسانی سے اندازہ لگائے جا سکتے ہیں۔ اس لیے پن کوڈ کی مدد سے ایک اور رکاوٹ پیدا کی جا سکے گی جو صرف بھروسے مند افراد کو چیٹ شروع کرنے کی اجازت دے گی۔
فی الحال یہ فیچر ترقی کے مراحل میں ہے اور آئندہ اپ ڈیٹس میں دستیاب ہوگا۔
