لاہور – پولیس میں احتساب کی مثال قائم کرتے ہوئے چار ڈولفن فورس اہلکاروں کو رشوت لینے کے الزام میں نوکری سے فارغ کردیا گیا۔ یہ کارروائی ڈی آئی جی آپریشنز فیصل کامران کی ہدایت پر عمل میں لائی گئی۔
برطرف اہلکاروں میں طاہر، قیصر، یاسین اور خادم علی شامل ہیں، جنہیں انکوائری میں قصوروار ثابت ہونے پر سزا دی گئی۔ انکوائری رپورٹ کے مطابق 17 ستمبر کو حاجی کیمپ کے قریب ان اہلکاروں نے ایک ڈاکٹر کو تلاشی کے بہانے سنسان پلاٹ میں لے جا کر سنگین نتائج کی دھمکیاں دیں اور زبردستی 29 ہزار روپے رشوت وصول کی۔
ڈی آئی جی فیصل کامران نے کہا کہ پولیس کی بدنامی کا باعث بننے والے عناصر کے لیے محکمے میں کوئی جگہ نہیں۔ انہوں نے مزید بتایا کہ محکمانہ احتساب کے تحت گزشتہ 18 ماہ میں 400 سے زائد اہلکاروں کو مختلف سزائیں دی جا چکی ہیں۔
