لاہور: لاہور کے علاقے غازی آباد میں کمسن گھریلو ملازمہ پر مبینہ تشدد کا افسوسناک واقعہ پیش آیا۔
پولیس کے مطابق 9 سالہ مقدس نامی بچی تاج باغ کے علاقے میں ناہید نامی خاتون کے گھر کام کرتی تھی۔ ایک روز قبل مقدس نے چھٹی کی جس پر ناہید بچی کے گھر پہنچی اور وہاں مبینہ طور پر اس پر تشدد کیا۔
تشدد کے دوران مقدس کے منہ سے خون بہنے لگا، جس کے بعد ملزمہ ناہید اپنے شوہر سہیل کے ہمراہ موقع سے فرار ہوگئی۔
اہلِ محلہ نے فوری طور پر پولیس کو اطلاع دی۔ غازی آباد پولیس نے بچی کی والدہ ثمینہ کی مدعیت میں مقدمہ درج کر کے واقعے کی تحقیقات شروع کر دی ہیں۔
