کراچی، 7 اگست: لیاری کے علاقے چاکیواڑہ میں 45 سالہ خاتون کو مبینہ طور پر اس کے شوہر نے غیرت کے نام پر قتل کر دیا۔ پولیس کے مطابق، ملزم نواب نے اپنی بیوی بختاور پر کسی سے فون پر بات کرنے کا شک ظاہر کیا، جس پر گھریلو جھگڑے کے دوران اس پر فائرنگ کردی۔
چاکیواڑہ تھانے کے انچارج انسپکٹر سجاد دھریجو کے مطابق، نواب نے غصے میں آ کر 30 بور پستول سے فائر کیا۔ واقعے کے بعد اہلِ علاقہ کی مدد سے پولیس نے ملزم کو موقع پر ہی گرفتار کر لیا، جس کے قبضے سے آلہ قتل بھی برآمد کر لیا گیا۔
مقتولہ کی لاش کو ضروری کارروائی کے لیے سول اسپتال کراچی منتقل کیا گیا، تاہم ورثاء کی جانب سے لاش وصول نہ کرنے پر مقامی افراد نے اسے مردہ خانے منتقل کروا دیا۔
پولیس نے مقدمہ درج کرکے مزید تفتیش شروع کر دی ہے۔
