کراچی — کراچی کے پوش علاقے ڈیفنس سے چوری کے الزام میں گرفتار گھریلو ملازم کے کروڑوں روپے کے اثاثے سامنے آگئے۔
پولیس کے مطابق ملزم کی ماہانہ تنخواہ صرف 45 ہزار روپے تھی، تاہم اس کے چار بینک اکاؤنٹس سے 1 کروڑ 86 لاکھ روپے کی ٹرانزیکشنز کا انکشاف ہوا ہے۔
تحقیقات سے پتہ چلا کہ ملزم نے مبینہ طور پر چوری کی رقم سے کراچی میں فلیٹ، ہری پور اور اسلام آباد میں پلاٹس خریدے، جبکہ اس کے نام پر ایک مسافر وین بھی رجسٹرڈ ہے جو ہری پور روٹ پر چلتی ہے۔
پولیس نے مزید بتایا کہ ملزم کے قبضے سے 1 کروڑ روپے مالیت کا سونا بھی برآمد ہوا ہے۔
ملزم گزشتہ آٹھ سال سے ڈیفنس میں مقیم ایک بزرگ جوڑے کے گھر پر ملازمت کر رہا تھا۔
تحقیقات جاری ہیں تاکہ یہ معلوم کیا جا سکے کہ آیا اس واردات میں دیگر افراد بھی ملوث تھے یا نہیں۔
