کراچی: اینٹی وہیکل لفٹنگ سیل (اے وی ایل سی) پولیس نے کارروائی کرتے ہوئے گورنر خیبرپختونخوا کے میڈیا ایڈوائزر سے اسلحے کے زور پر چھینی گئی گاڑی برآمد کرلی۔
پولیس کے مطابق اے وی ایل سی ٹیم نے پیشہ ورانہ مہارت، جدید ٹیکنالوجی اور خفیہ ذرائع کی مدد سے کامیاب کارروائی کرتے ہوئے مذکورہ گاڑی برآمد کی۔ برآمد شدہ گاڑی پر جعلی نمبر پلیٹ BRA-996 لگی ہوئی تھی، جبکہ اصل رجسٹریشن نمبر BKP-342 ہے۔
ایس ایس پی امجد شیخ کے مطابق سی سی ٹی وی فوٹیج کی مدد سے واردات میں ملوث ملزمان کی شناخت سجاد لاشاری، عمران سرائیکی، عبید پنجابی اور شہزاد لاشاری کے ناموں سے کی گئی۔ ملزمان کی گرفتاری کے لیے چھاپے مارے جا رہے ہیں اور پولیس کو ان کی جلد گرفتاری کی توقع ہے۔
پولیس کے مطابق قانونی کارروائی مکمل کرنے کے بعد برآمد شدہ گاڑی گورنر خیبرپختونخوا کے میڈیا ایڈوائزر علی ایوب کے حوالے کر دی گئی ہے۔
واضح رہے کہ 22 اکتوبر کو کراچی کے ایف بی صنعتی ایریا تھانے کی حدود طاہرولا چورنگی کے قریب نامعلوم مسلح ملزمان نے علی ایوب کی گاڑی اسلحے کے زور پر چھین لی تھی اور فرار ہو گئے تھے۔
