معروف اداکار اور ہدایتکار یاسر حسین نے اداکارہ اور میزبان نادیہ خان کے ڈرامہ تجزیوں پر سخت تنقید کرتے ہوئے انہیں غیر سنجیدہ اور گہرائی سے خالی قرار دیا ہے۔
ایک حالیہ انٹرویو میں یاسر حسین نے کہا کہ نادیہ خان کو اداکارہ کے طور پر کم شہرت ملی اور زیادہ وہ مارننگ شو کی میزبان کے طور پر جانی جاتی ہیں، خاص طور پر ان کا مشہور جملہ "ہیپی ٹو یو” ان کی پہچان بن چکا ہے۔ انہوں نے واضح کیا کہ نادیہ خان نے کبھی کوئی ڈرامہ پروڈیوس یا ڈائریکٹ نہیں کیا، اس لیے وہ یہ فیصلہ کرنے کی اہل نہیں کہ کون سا ڈرامہ اچھا ہے اور کون سا برا۔
یاسر حسین نے سوال اٹھایا، "اگر آپ نے خود کبھی یہ کام نہیں کیا تو دوسروں کو یہ کیسے بتا سکتی ہیں کہ یہ کام کیسے کرنا چاہیے؟” انہوں نے مزید کہا کہ یہ تصور کرنا مشکل ہے کہ کوئی مصروف اور کامیاب ہدایتکار نادیہ خان کو صرف اس لیے کال کرے کہ انہیں کسی ڈرامے کی ریٹنگ زیادہ لگی ہے۔ یاسر کے مطابق ایسا محسوس ہوتا ہے کہ نادیہ خان اپنے شو کی اہمیت اجاگر کرنے کی کوشش کر رہی تھیں۔
انٹرویو کے آخر میں یاسر حسین نے مشورہ دیا کہ نادیہ خان کے تبصروں کو زیادہ سنجیدگی سے نہیں لینا چاہیے کیونکہ وہ اکثر سطحی اور فنی اعتبار سے کمزور ہوتے ہیں۔ انہوں نے زور دیا کہ ایسے تبصرے پیشہ ورانہ معیار پر پورے نہیں اترتے۔
