اروبا ابراہیم
30 جون 2025:
خیبر پختونخوا میں مسلسل بارشوں، طغیانی اور آندھی آنے کے نتیجے میں ہونے والی تباہی کی تازہ تفصیلات صوبائی ڈیزاسٹر مینجمنٹ اتھارٹی (پی ڈی ایم اے) نے جاری کر دی ہیں۔
پی ڈی ایم اے کی رپورٹ کے مطابق، 25 جون سے جاری موسلادھار بارشوں اور سیلابی ریلوں کے باعث صوبے بھر میں کم از کم 22 افراد جاں بحق جبکہ 11 افراد زخمی ہو چکے ہیں۔ جاں بحق ہونے والوں میں 7 مرد، 5 خواتین اور 10 بچے شامل ہیں، جبکہ زخمیوں میں 6 مرد، 4 خواتین اور ایک بچہ شامل ہے۔
سب سے زیادہ متاثرہ ضلع سوات رہا، جہاں شدید بارشوں اور لینڈ سلائیڈنگ کے باعث 14 افراد زندگی کی بازی ہار گئے جبکہ 6 افراد زخمی ہوئے۔
رپورٹ میں بتایا گیا ہے کہ انسانی جانوں کے ساتھ ساتھ املاک کو بھی شدید نقصان پہنچا ہے۔ مختلف اضلاع میں 64 مکانات کو جزوی نقصان پہنچا ہے جبکہ 11 مکانات مکمل طور پر تباہ ہو چکے ہیں۔
متاثرہ علاقوں میں ریسکیو اور امدادی سرگرمیاں جاری ہیں۔ ریسکیو حکام کے مطابق، ایک واقعے میں دریائے سوات میں پھنسے ایک خاندان کو بچانے کی کارروائی کی گئی، تاہم ریسکیو ٹیم کے جائے وقوعہ تک پہنچنے کے وقت کے بارے میں کوئی باضابطہ معلومات فراہم نہیں کی گئیں۔
پی ڈی ایم اے نے شہریوں کو مزید احتیاط برتنے کی ہدایت جاری کی ہیں، خاص طور پر ان اضلاع میں جو شدید بارشوں اور لینڈ سلائیڈنگ کے خطرے سے دوچار ہیں۔ محکمہ موسمیات نے آئندہ دنوں میں مزید بارشوں اور ممکنہ طغیانی کی پیشگوئی کی ہے۔
