فیصل آباد/ڈسکہ – پنجاب کے مختلف علاقوں میں پیش آنے والے دو الگ الگ ٹریفک حادثات میں چار افراد جاں بحق اور متعدد زخمی ہوگئے۔
پہلا حادثہ جڑانوالہ میں تھانہ بلوچنی کی حدود میں پیش آیا، جہاں تیز رفتار ٹرک نے مزدوروں کے ایک گروہ کو کچل دیا۔ واقعے میں تین مزدور موقع پر جاں بحق جبکہ ایک شدید زخمی ہوا۔ ٹرک ڈرائیور موقع سے فرار ہوگیا تاہم پولیس نے گاڑی قبضے میں لے کر کارروائی شروع کر دی ہے۔
ڈسکہ میں ایک اور حادثے میں تیز رفتار کار موٹر سائیکل پر چڑھ دوڑی جس کے نتیجے میں 20 سالہ حسنین موقع پر جاں بحق جبکہ اس کے ساتھی محمود اور علی رضا شدید زخمی ہوگئے۔ دونوں زخمیوں کو تشویشناک حالت میں سول اسپتال منتقل کیا گیا۔ پولیس کے مطابق دونوں حادثات کی تحقیقات جاری ہیں۔
