کراچی – نارتھ ناظم آباد کی کوثر نیازی کالونی میں افسوسناک واقعہ پیش آیا جہاں ایک باپ نے مالی دباؤ اور قرض کے بوجھ تلے اپنی 2 کمسن بیٹیوں کے گلے کاٹ کر قتل کردیا۔
پولیس کے مطابق گرفتار ملزم کی شناخت اکبر ولد عبدالستار کے نام سے ہوئی ہے، جس نے اپنی 10 سالہ زینب اور 11 سالہ عالیہ کو بے دردی سے قتل کیا۔ ابتدائی تفتیش میں انکشاف ہوا ہے کہ ملزم شدید مالی مشکلات اور قرض کے دباؤ کا شکار تھا۔ اس کے 6 بچے ہیں جن میں ایک بیٹا اور پانچ بیٹیاں شامل ہیں۔
عینی شاہدین کے مطابق واقعے کی اطلاع ملتے ہی علاقہ مکینوں نے ملزم کو پکڑ کر تشدد کا نشانہ بنایا، تاہم پولیس نے بروقت پہنچ کر اسے حراست میں لے لیا۔ واقعے کے بعد علاقے میں شدید غم و غصے کی فضا پھیل گئی۔
پولیس نے بچیوں کے قتل کا مقدمہ ملزم کے بیٹے ارسلان کی مدعیت میں درج کرلیا ہے، جس میں قتل کی دفعات شامل کی گئی ہیں۔ مزید تفتیش جاری ہے۔
