کراچی: سپریم کورٹ کے فیصلے کے بعد بلدیہ فیکٹری کیس میں رہائی پانے والے رحمان عرف "بھولا” کو پولیس نے ایک بار پھر گرفتار کر لیا ہے۔ اے آر وائی نیوز کے مطابق رحمان کو کراچی کے علاقے نارتھ ناظم آباد میں اس کے رہائشی مکان پر چھاپہ مار کر حتحرافت میں لیا گیا۔
ذرائع کے مطابق رحمان کو گزشتہ شب ایم کیو ایم پاکستان کے بہادرآباد مرکز پر ہونے والے مسلح تصادم اور فائرنگ کے واقعے کے سلسلے میں گرفتار کیا گیا۔ اس کارروائی کے دوران پولیس نے سوسائٹی سیکٹر کے ایم کیو ایم پی انچارج ذیشان کو بھی حتحرافت میں لے لیا ہے، جبکہ عبید کے ٹو سمیت دو دیگر کارکنوں کے گھروں پر بھی چھاپے مارے گئے ہیں۔
واضح رہے کہ اتوار کی شب ایم کیو ایم پاکستان کے بہادرآباد مرکز پر خالد مقبول صدیقی اور مصطفیٰ کمال کے حامیوں کے درمیان شدید مسلح تصادم ہوا تھا۔ تنازع اس وقت شروع ہوا جب خالد مقبول صدیقی کا گروپ یومِ آزادی کی تقریبات کے حوالے سے اجلاس کر رہا تھا کہ اسی دوران انیس قائمخانی کی قیادت میں مصطفیٰ کمال کے حامی بھی مرکز میں پہنچ گئے۔ دفتر کی انتظامیہ کی جانب سے دوسرے گروپ کو اندر جانے سے روکنے پر تلخ کلامی ہوئی جو دیکھتے ہی دیکھتے ہاتھ پائی اور کرسیاں چلنے تک جا پہنچی۔ جھگڑے کے دوران فائرنگ کے نتیجے میں دو کارکن زخمی ہو گئے۔
ہنگامہ آرائی اور فائرنگ کے بعد صورتحال کشیدہ ہونے پر پولیس اور رینجرز کی بھاری نفری نے موقع پر پہنچ کر ایم کیو ایم پاکستان کے مرکز کو بند کرا دیا تھا اور امن و امان برقرار رکھنے کے لیے سیکیورٹی اہلکاروں کو تعینات کر دیا گیا ہے۔ پولیس کا کہنا ہے کہ نامزد ملزمان کے خلاف مزید قانونی کارروائی عمل میں لائی جا رہی ہے۔
