پاکستان تحریک انصاف (پی ٹی آئی) کے بانی عمران خان نے اپنی سابقہ اہلیہ جمائمہ گولڈ اسمتھ کی والدہ لیڈی اینابیل گولڈ اسمتھ کے انتقال پر گہرے دکھ اور افسوس کا اظہار کیا ہے۔
سماجی رابطوں کی ویب سائٹس پر جاری اپنے تعزیتی پیغام میں عمران خان نے کہا کہ انہیں اس افسوسناک خبر کا علم گزشتہ روز اپنے اہلِ خانہ سے ہوا۔
انہوں نے لکھا:
"مجھے لیڈی اینابیل گولڈ اسمتھ کے انتقال کی خبر سن کر گہرا صدمہ پہنچا۔ وہ میرے بیٹوں کی بہترین نانی اور نہایت مہربان، شفیق اور ہمدرد انسان تھیں۔”
عمران خان نے مزید کہا کہ وہ جب بھی لندن جاتے، اپنے بیٹوں کے ہمراہ انہی کے گھر قیام کرتے تھے۔
"وہ میرے لیے میری والدہ کی مانند تھیں، خاص طور پر 1985 میں میری والدہ کے انتقال کے بعد،” انہوں نے لکھا۔
انہوں نے کہا کہ ان کی وفات ایک بڑا نقصان ہے، وہ ہمیشہ یادوں میں زندہ رہیں گی۔
"میں ان کے تمام بچوں، پوتے پوتیوں اور نواسے نواسیوں سے دل کی گہرائیوں کے ساتھ تعزیت کرتا ہوں۔ اگر میں قید میں نہ ہوتا تو اپنے بیٹوں سلیمان اور قاسم کے ساتھ ان کی آخری رسومات میں شریک ہوتا،” عمران خان نے کہا۔
واضح رہے کہ لیڈی اینابیل گولڈ اسمتھ، جو برطانیہ کی معروف سماجی شخصیت تھیں، 18 اکتوبر کو 91 سال کی عمر میں انتقال کر گئی تھیں۔
