کراچی: اورنگی ٹاؤن میں ڈکیتی مزاحمت پر زخمی ہونے والا رینٹ اے کار کا مالک دوران علاج دم توڑ گیا۔
تفصیلات کے مطابق پاکستان بازار تھانے کی حدود بنگلہ بازار میں ہفتے اور اتوار کی درمیانی شب فائرنگ سے زخمی ہونے والا شخص جناح اسپتال میں دوران علاج جاں بحق ہوگیا۔ جاں بحق ہونے والے کی شناخت 50 سالہ محمد عالمگیر ولد محمد اسلام کے نام سے ہوئی۔
پولیس کے مطابق محمد عالمگیر اورنگی ٹاؤن کا رہائشی اور رینٹ اے کار کا کاروبار کرتا تھا۔ وہ رات تقریباً پونے ایک بجے اپنے دفتر میں موجود تھا کہ دو مسلح ڈاکو اندر داخل ہوئے۔ ڈاکو پہلے دفتر میں موجود دو افراد کو لوٹنے کے بعد عالمگیر کی طرف بڑھے تو اس نے مزاحمت کرتے ہوئے ایک پانا اٹھالیا، جس پر ڈاکوؤں نے فائرنگ کردی اور موقع سے فرار ہوگئے۔
گولی عالمگیر کے پیٹ میں گردے کے قریب لگی جس کے باعث وہ شدید زخمی ہوگیا۔ زخمی کو چھیپا ایمبولینس کے ذریعے عباسی شہید اسپتال منتقل کیا گیا، تاہم وہاں مناسب سہولیات نہ ہونے پر اسے جناح اسپتال لے جایا گیا، جہاں وہ زخموں کی تاب نہ لاتے ہوئے چل بسا۔ لاش کو ضروری کارروائی کے بعد ورثا کے حوالے کردیا گیا۔
