کراچی : اینٹی وہیکل لفٹنگ سیل (اے وی ایل سی) پولیس نے گورنر خیبرپختونخوا کے میڈیا ایڈوائزر علی ایوب سے اسلحے کے زور پر چھینی گئی گاڑی کامیاب کارروائی کے دوران برآمد کرلی۔
پولیس کے مطابق کارروائی پیشہ ورانہ مہارت، جدید ٹیکنیکی ذرائع اور خفیہ معلومات کی بنیاد پر کی گئی، جس کے دوران برآمد شدہ گاڑی پر جعلی نمبر پلیٹ BRA-996 لگی ہوئی تھی جبکہ گاڑی کا اصل رجسٹریشن نمبر BKP-342 ہے۔
ایس ایس پی امجد شیخ کے مطابق سی سی ٹی وی فوٹیج کی مدد سے واردات میں ملوث ملزمان کی شناخت سجاد لاشاری، عمران سرائیکی، عبید پنجابی اور شہزاد لاشاری کے ناموں سے کی گئی، جن کی گرفتاری کے لیے چھاپے مارے جا رہے ہیں۔
پولیس کے مطابق قانونی کارروائی مکمل ہونے کے بعد گاڑی گورنر خیبرپختونخوا کے میڈیا ایڈوائزر علی ایوب کے حوالے کر دی گئی۔
واضح رہے کہ 22 اکتوبر کو ایف بی صنعتی ایریا تھانے کی حدود طاہر ولا چورنگی کے قریب نامعلوم مسلح ملزمان نے علی ایوب کی گاڑی چھین کر فرار ہو گئے تھے۔
